په نایجریا کې پوځ او چارواکو نن یکشنبه مارچ ۲۴ (حمل څلورمه) وویل چې د دغه هېواد په شمال لویدیځ کې د ښوونځي ۱۳۷ تنه زده کوونکي، چې وسله والو تښتولي وو، بېرته خوشي شوي او ټول سلامت دي.
وسله والو د مارچ په اوومه نېټه د نایجریا د کادونا د کوریګا په سیمه کې دا زده کوونکي وتښتول. په دومره شمېر کې او په یو ځل د دومره زده کوونکو اختطاف په نایجریا کې بیساری بلل کېده چې د دغه هېواد په امنیت باندې یې د خلکو انتقادونه هم راوپارولي وو.
په لومړي سر کې ښوونکو ویلي وو چې ۲۸۰ کسان تښتول شوي، خو پوځ وایي ۱۳۷ زده کوونکي ژغورل شوي دي.
د نایجریا د پوځ ویاند ادوارډ بوبا وویل: «ژغورل شوي کسان ۱۳۷ تنه دي چې ۷۶ یې نجونې او ۶۱ یې هلکان دي. دوی د زامفارا په ایالت کې ژغورل شوي چې د نورو اقداماتو لپاره به د کادونا ایالت حکومت ته وسپارل شي.»
نوموړي د فرانس خبري اژانس ته ویلي دي چې ژغورل شوي کسان ټول هماغه دي چې تښتول شوي وو.
د کادونا ایالت والي اوبا ساني په یوې اعلامیې کې ویلي دي: «د کوریګا ښوونځي تښتول شوي ماشومان صحیح سلامت ژغورل شوي. دا رښتیا هم د خوشحالۍ ورځ ده.» نوموړي د دغو زده کوونکو په ژغورلو کې د پوځ او نورو دخېلو ارګانونو او افرادو څخه مننه کړې ده.
د نایجریا رسنۍ وايي د تښتول شویو زده کوونکو عمرونه د اتو او ۱۵ ترمنځ وو.
سیمه ایزې جنايي لوټمارې ډلې، چې د پېسو لپاره خلک تښتوي، د دغو زده کوونکو په اختطاف تورنې شوې وې. چارواکي وايي د پوځ غړو د اختطاف شویو ماشومانو پسې ځنګلونو لټول، خو نور معلومات یې نه دي ورکړي.
د زده کوونکو کورنۍ وايي اختطافګرو ډېرې پېسې غوښتي، خو د نایجریا ولسمشر تینیبو وايي چې امنیتي ځواکونو ته یې سپارښتنه کړې وه چې پېسې به نه ورکوي.
په نایجریا کې تښتول شوي کسان معمولا د چارواکو سره د خبرو له لارې پرېښودل کېږي، دا هېواد په ۲۰۲۲ کې یو قانون تصویب کړ چې اختطافګرو ته به پېسې نه ورکوي. په نایجریا کې د اختطاف پېښې زیاتې دي.
د دغه هېواد د خطر ارزولو یوه مشورتي اداره وایي چې د تېرکال د مۍ له میاشتې راهېسې ۴۷۷۷ کسان تښتول شوي دي. ځينې کارپوهان وايي چې د نایجریا د خراب اقتصاد له کبله په دغه هېواد کې د تښتولو پېښې مخ په زیاتېدو دي.
فورم \ دبحث خونه