د لاس رسي وړ اتصالات

د افغانستان نهه ولایتونه هېڅ خبریاله نلري- سروې


افغان ښځینه خبریالانې

د افغان خبریالانو د خوندیتوب کمېټه د مارچ په اتمه د ښځو د نړیوالې ورځې په مناسبت اعلان وکړ چې افغانستان کې په رسنیو کې د کارکوونکو ښځو برخه ۱۸ سلنه کمه شوې ده.

د دغې کمېټې د یوې سروې په اساس د افغانستان په نهو ولایتونو کې هېڅ یوه خبریاله کار نکوي.

د یادې کمېټې د جندر د برخې مسؤلې وحیدې فیضي نن دوشنبه د مارچ اتمه (کب ۱۸) امریکا غږ ته وویل چې یادې کمېټې د ۳۴ ولایتونو په ۹۰ فعاله رسنیو کې د ښځینه کار کوونکو د حضور په اړه سروې کړې ده. وايي سروې په دغه هیواد کې د خبریالانو د بد وضعیت په ډاګه کوي.

نوموړې زیاته کړه: "د دغې سروې مطابق، د رسنیو ۳۰۰ ښځینه خبریالانو او کار کوونکو د امنیتي ګواښونو، په ځانګړي ډول هدفي بریدونو، د کرونا ویروس له امله د رسنیو مالي ستونزو، د کمو معاشاتو او ځينو نورو ستونزو له امله خپلې دندې پريښي دي."

د افغان خبریالانو د خوندیتوب کمېټې شمېرې ښيي چې د ۱۳۹۹ کال په لومړیو شپږو میاشتو کې ۱۶۷۸ افغان مېرمنو د رسنیو په بېلابېلو برخو کې کار کاوه، خو اوس دغه شمېرې ۱۳۷۷ ته راټیټه شوې دي.

وحیدې فیضي وویل چې د یادو ۱۳۷۷ ښځینه کار کوونکو له ډلې یوازې ۳۲۱ یې خبریالانې دي او پاتې په نورو برخو کې کار کوي.

د نوموړې په وینا په کابل، هرات او بلخ هغه ولایتونو دي چې نسبت نورو ولایتونو پکې زیاتو ښځينه خبریالانې کار کوي.

د هغې په وینا نهه نور غور، نیمروز، سرپل، لغمان، پروان، کاپیسا، ارزګان، میدان وردګ او لوګر هغه ولایتونه دي چې هېڅ ښځینه خبریاله پکې کار نه کوي، بلکې ښځې د رسنیو په نورو برخو کې کار کوي.

د افغان خبریالانو د خوندیتوب کمېټې د جندر د برخې مسؤلې وویل: "د افغانستان په پنځو ولایتونو چې هغه کې نورستان، کونړ، پکتیا، پکتیکا او زابل شامل دي هېڅ‌ ښځه په رسنیو کې کار نه کوي، یوازې په لوګر ولایت کې یوه ښځه د رسنیو په نورو برخو کې کار کوي."

دا په داسې حال کې ده چې روانه میاشت په ننګرهار کې د انعکاس خصوصي تلویزیون درې خبریالانې د ناڅرګندو کسانو په برید کې ووژل شوې.

د افغان خبریالانو د خوندیتوب کمېټه وايي چې په وران کال کې څلور ښځينه خبریالانې او رسنیو کار کوونکې په دغه هیواد کې وژل شوي دي.

XS
SM
MD
LG