د لاس رسي وړ اتصالات

افغانستان کې د کروناویروس په تازه پېښو ۵۴ نور ناروغان مړه شوي


عکس (ارشیف)

د افغانستان د عامې روغتیا وزارت په تیرو ۲۴ ساعتونو کې د هیواد بېلا بېلو ولایتونو کې د کرونا ویروس د ۱۷۲۴ مثبتو پېښو ثبتېدو او ۵۴ ناروغانو د مړه کېدو خبر ورکړی دی.

روغتیا وزارت نن سې شنبه جون اتمه (غبرګولې ۱۸) ویلي چې په تیره شپه او ورځ کې د کرونا ویروس د ۴۹۵۹ سمپلونو معاینات کړي چې ۱۷۲۴ مثبت و.

د وزارت د معلوماتو په اساس د نویو ارقامو په ثبتېدو سره په افغانستان کې د کروناویروس د ټولو ثبت شویو مثبتو پېښو شمېر ۸۴۰۵۰ ته ورسېد.

همدارنګه په تیرو ۲۴ ساعتونو کې په افغانستان کې د کرونا له امله ۵۴ ناروغان مړه شوي چې په دې سره د کرونا له امله د ټولو مړو شمېر ۳۳۰۵ ته پورته شو.

د افغانستان د روغتیا وزارت ویلي چې په تېره شپه او ورځ کې له کرونا ویروس څخه ۵۷۱ تنه بېرته روغ شوي چې دې سره د ټولو بیرته روغ شویو کسانو شمېر ۵۹۵۶۹ ته لوړ شو.

کرونا ویروس د لومړي ځل لپاره د ۲۰۱۹ کال په ډسمبر میاشت کې د چین د هوبي ایالت په ووهان ښار کې پيدا شو.

د امریکا د جانس هاپکینز پوهنتون د معلوماتو په اساس تر دا مهاله په ټوله نړۍ کې څه باندې ۱۷۳میلیونه وګړي ورباندې اخته شوي چې له دې شمېرې څه باندې درې میلیونه او ۷۲۹زره مړه شوي دي.

XS
SM
MD
LG