د افغانستان لپاره د بریتانیا پخوانی سفیر نیکولاس کې وايي، د دوحې په غونډه کې د طالبانو نه ګډون ددغه ډلې او افغانستان لپاره ښه پایلې نلري او دی د افغانستان راتلونکي ته هېله من نه دی.
خو دغه بریتانوی ډپلوماټ وايي، د ملګرو ملتونو عمومي منشي د دوحې د غونډې له پایلو خوښ دی او د افغانستان دپاره د ملګرو ملتونو د ځانګړي استازي د ګمارلو په اړه به سلا مشورې دوام ولري.
نیکولاس کې د امریکا غږ سره په ځانګړې مرکه کې وویل: "نړیوال به د افغانستان لپاره د ځانګړي استازي د ټاکلو او د یو نوي جوړښت لپاره له اړوندو هیوادونو او ښايي لویو هیوادونو څخه د یو ګروپ او تر شا یې د یو بل لوی ګروپ د جوړېدو په اړه خپلو مشورو ته دوام ورکړي."
د نیکولاس کې په نظر، د طالبانو اوسنی دریځ پر ډېرو زیاتو افغانانو ناوړه اغېزې کوي. هغه وايي، افغانان به د نړیوالو له خوا د طالبانو په رسمېت نه پېژندل کېدو او له افغانستان سره د اقتصادي مرستو د کمښت له امله د نورو زیاتو ستونزو سره مخامخ شي.
له نیکولاس کې سره بشپړه مرکه دلته وګورئ.
فورم \ دبحث خونه