د لاس رسي وړ اتصالات

پاکستان د کرونا له ویرې هرات کې خپله قونسلګري وتړله


کابل کې د پاکستان سفارت

پاکستان د افغانستان په هرات ولایت کې د خپلې قونسلګرۍ د وېزې ورکولو څانګه د پنځلسو ورځو لپاره تړلې ده.

په کابل کې د پاکستان سفارت د «مارچ پر ۵مه» په یوه اعلامیه کې ویلي چې یاده څانګه یې د کرونا ویروس خپرېدو د مخنیوي په هدف تړلې ده.

دغه سفارت همدارنګه زیاته کړې چې د وېزو ورکولو کار د بیا پیلولو مخکې به له افغان حکومت سره مشوره وکړي.

دا په داسې حال کې ده چې له ایران څخه تازه راغلي افغانان پاکستان ته د تګ لپاره د وېزې اخستلو لپاره په هرات کې د دغه هیواد و قونسلګرۍ ته مراجعه کوي.

د تېرو څو ورځو راپدېخوا په ایران کې د کرونا ویروس له امله ۱۰۷ تنه مړه شوي او سلګونه نور پرې اخته شوي دي.

پاکستان په هرات کې د خپلو قونسلي چارو په ځنډېدو سره هڅه کوي چې خپل هیواد ته له ایران څخه د تازه راغلو کسانو د راتګ لړۍ وځنډوي.

پاکستان د دې ترڅنګ د مارچ له لومړۍ نېټې څخه د یوې اونۍ لپاره له کندهار ولایت سره پر پوله د چمن دروازه هم د کرونا ویروس انتقال د مخنیوي په هدف د هر ډول تګ راتګ پر مخ تړلې ده.

په پاکستان کې هم د کرونا ویروس د ثبتېدو خبر ورکړل شوی دی.

په افغانستان کې هم تر دا مهاله د کرونا ۱۱۹ پېښې ثبت شوي چې یوه مثبت او پاتې ۸۲ نوریې منفي ثابتي شوي دي.

د افغانستان د روغتیا وزارت ویاند ډاکټر وحیدالله مایار نن جمعه ویلي چې ۳۶ نورې مشکوکې پېښې تر څېړنو لاندې دي چې نتیجه به یې وروسته معلومه شي.

د یادو مشکوکو پېښو زیاتې یې په هرات او کابل کې او تر هغه وروسته په غور، غزني، فاریاب، فراه، هلمند، بغلان، کندهار، لوګر، بدخشان او بلخ کې ثبت شوي دي.

XS
SM
MD
LG