د امریکا د جګړې وزارت د جمعې په ورځ هغه راپورونه رد کړل چې ګواکې متحده ایالات د جنګي مهماتو له کمښت سره مخ دي.
د پنټاګون ویاند، شان پارنل، امریکا غږ ته وویل: "موږ هغه څه لرو چې ورته اړتیا لرو، په هغه ځای او وخت کې چې ولسمشر یې د کارولو پرېکړه وکړي."
واشنګټن پوسټ پدې اونۍ کې راپور ورکړ چې د امریکا ولسمشر ډونالډ ټرمپ د جګړې له وزیر، پیټ هیګسیت، سره د ایران پر وړاندې د عملیاتو د دوام لپاره د اړینو مهماتو د کمښت د راپورونو پر سر اختلاف درلود.
ولسمشر ټرمپ د پنجشنبې په ورځ دا راپور رد کړ، او د ټروت سوشل په ټولنیزې رسنۍ کې یې ولیکل چې هغه د امریکا د جګړې وزیر له کړنو "ډېر خوښ" دی.
د امریکا غږ د یوې پوښتنې په ځواب کې، پارنل دا راپورونه رد کړل. هغه وویل، "موږ په څو جنګي قوماندانیو کې بریالۍ عملیات ترسره کړي دي، او په ورته وخت کې د خپلو خلکو او خپلو ګټو د دفاع لپاره د وسلو زیرمې هم ساتلي دي."
پارنل خبرداری ورکړ هغه رسنیز راپورونه چې د امریکا د پوځي وړتیاوو په اړه بې بنسټه ادعاوې مبالغه کوي، کیدای شي دښمنان پر امریکایي ځواکونو د تحریک یا برید لپاره زړه ور کړي.
د پنټاګون ویاند وویل: "د متحده ایالاتو پوځ د ځمکې پر مخ تر ټولو پیاوړی جنګي ځواک دی."
د امریکا ولسمشر ډونالډ ټرمپ د پنجشنبې په ورځ (د اګست ۶مه) وویل چې د متحده ایالاتو د مهماتو زېرمې په ټولیز ډول قوي دي، که څه هم هغه ومنله چې په ځینو برخو کې زېرمې "ډېرې محدودې" دي.
ولسمشر ټرمپ په سپینه ماڼۍ کې د مهماتو د زېرمو په اړه د راپورونو په اړه د یوه خبریال پوښتنې ته ځواب ورکړ: "موږ یو لړ بیلابیلې ځواکمنې وسلې لرو چې ډیرې زیاتې دي؛ یعنې، موږ تقریباً د هغوی بې حده اکمالات لرو."
ډونالډ ټرمپ زیاته کړه: "خو موږ ځینې نورې هم لرو چې کچه یې یو څه محدوده ده، او موږ هره ورځ د هغوی د ترلاسه کیدو او تامین په حال کې یو."
د امریکا ولسمشر وویل چې د هېواد دفاعي شرکتونه د پاتریوت او تاماهاک مزایلونو د تولید په ګډون، نورې جوړوي.
ډونالډ ټرمپ ټینګار وکړ چې متحده ایالات "په ډېر ښه حالت کې دي." هغه زیاته کړه: "خو، موږ تل ډېر غواړو، موږ باید ډېرې زېرمې ولرو... موږ واقعاً ډیر زیات مهمات په واک کې لرو."
فورم \ دبحث خونه