د هلمند مدني ټولنه وايي، وسله والو طالبانو له تېرو شاوخوا دریو میاشتو راهېسې په دغه ولایت کې ماشومانو ته د ګوزڼ ضد واکسین پر ټولو پروګرامونو بندیز لګولی، او د عامې روغتیا کارکوونکو ته یې خبرداری ورکړی چې ماشومان واکسین نه کړي .
د دغې ټولنې مشر سردار محمد همدرد امریکا غږ اشنا راډیو ته وویل چې د طالبانو په دغه کار سره شاوخوا پنځه سوه زره ماشومان د پولیو له واکسین څخه بې برخې پاتې شوي دي.
ښاغلی همدرد وایي "وسله والو طالبانو د هلمند په ټولو ولسوالیو کې ماشومانو ته د ګوزڼ ضد پر واکسین کولو بندیز لګولی دی، دلته د عامې روغتیا د ریاست د پولیو د تېرو پروګرامونو د ارقامو له مخې شاوخوا پنځه سوه زره ماشومان له واکسین کولو پاتې شوي دي، چې دا ډېر بد خبر دی."
نوموړی وايي د روغتیا چارې سیاسي او پوځي نه دي او باید، د جګړې ټولې ښکیلې غاړې خلکو ته د روغتیايي اسانتیاوو په برابرولو کې له صحي کارکوونکو سره مرسته وکړي.
د افغانستان د عامې روغتیا وزارت هم مني چې د دوی کارکوونکو ته د ځینو وسله والو کړیو له لوري ویل شوي چې ماشومانو ته د پولیو ضد واکسین ونه کړي، خو دا نه وايي چې له کبله یې څومره ماشومان له واکسین کولو پاتې شوي.
د عامې روغتیا وزارت د ګوزڼ ضد د واکسین د برخې مشر ډاکټر اقاګل دوست امریکا غږ اشنا راډیو ته وویل چې د قومي مشرانو په منځګړتوب یې هڅه پیل کړي دي.
ښاغلی دوست زیاتوي چې "بلې هو، په هلمند کې ماشومانو ته د ګوزڼ ضد واکسین بند دی، موږ له قومي مشرانو غواړو چې د دغه بندیز په لېرې کولو کې مرسته وکړي ځکه چې دا په خپله د هغوی د ماشومانو حق دی، چې نباید ترې محرومه شي، موږ هڅه کو چې دغه پروګرام بېرته پیل کړو."
ښاغلي دوست وویل دا مهال یوازې په مرکز لښکرګاه کې د پولیو ضد د واکسین کولو یو مرکز شته چې په کې د ورځې لسګونه ماشومان واکسین کیږي .
نوموړي د جګړې پر ټولو ښکیلو غاړو غږ وکړ چې ولس ته په خاص ډول ماشومانو ته د صحي اسانتیاوو د برابرولو او رسولو مخه و نه نیسي.
هلمند هغه ولایت دی چې څو کاله دمخه په کې لږ تر لږه د ګوزڼ لس پېښې ثبتې شوې وې .
د افغانستان د عامې روغتیا وزارت وايي هر کال سلګونه زره ماشومانو ته د ګوزڼ ضد واکسینونه کوي، افغانستان لا هم د هغو هېوادونو په کتار کې راځي چې په ځینو برخو کې یې د ګوزڼ پېښې لیدل شوي دي.
وسله والو طالبانو په هلمند کې ماشومانو ته د پولیو ضد پر واکسین د بندیز په اړه لا څه نه دي ویلي خو وړاندې یې ویلي و چې دوی یوازې دا نه چې له دغه پروګرام سره کومه ستونزه نه لري بلکې له خپلو ټولو جنګیالیو غوښتي چې په دغه برخه کې له صحي کارکوونکو سره مرسته وکړي .
