د لاس رسي وړ اتصالات

د قطر امیر د افغانستان د حکومت او طالبانو د استازو سره کتلي


د قطر امیر د ډاکټر عبدالله عبدالله او د افغان هیت تر څنګ د طالبانو د استازو سره هم کتلي دي.

د قطر دولتي مطبوعات وایي چې د دې هیواد امیر شیخ تمیم بن حمد الثاني د افغانستان د حکومت او طالبانو د استازو سره کتلي او د سولې په خبرو کې یې دواړو خواوو ته کامیابي غوښتې.

د افغانستان د حکومت او طالبانو د استازو تر منځ د سولې مخامخ خبرې د قطر په پایتخت دوحه کې پرون د شبنې په ورځ پیل شوې او نن یې دویمه ورځ وه.

د قطر ملي اژانس په ټویټر کې لیکلي چې ښاغلي حمد د خبرو د پیل په هکله خوښې ښودلې.

د افغانستان د ملي روغې جوړې د عالي شوار مشر ډاکټر عبدالله عبدالله خپل د فیس بوک په پاڼه کې لیکلي چې د قطر امیر د افغانستان د سولې د هلو ځلو ملاتړ وښود او د دواړو خواوو تر منځ د توافق او جګړې په پای ته رسولو یې ټینګار وکړ.

اژانس لیکلي چې د قطر امیر د افغانستان د ملي روغې جوړې د عالي شورا د مشر عبدالله عبدالله او د سولې د مذکراتي پلاوي د غړیو سره کتلي. پدې خبرو کې د قطر امیر هیله ښودلې چې د سولې دا خبرې د افغان ولس د ملي یووالي، پرمختګ او نیکمرغۍ سبب شي.

د اژانس په راپور کې همدرانګه ویل شوي چې امیر تمیم بن حمد الثاني په قطر کې د طالبانو د سیاسي دفتر د مشر ملا عبدالغني برادر او طالبانو د استازو سره کتلي.

اژانس دا ندي ویلی چې دا لیدنه څه وخت شوې او پدې مجلس کې په کومو موضوعاتو خبرې شوي، خو په قطر کې د طالبانو د سیاسي دفتر ویاند، ډاکټر محمد نعیم په ټویټر کې لیکلي چې د قطر امیر د هغوي هڅې ستایلي او نورې همکارۍ ډاډ یې ورکړی.

په قطر کې د افغانستان د حکومت او طالبانو د استازو تر منځ د مخامخ خبرو د پیل کیدو نن دویمه ورځ وه. ویل کیږي چې دواړو خواوو د تماس تخنیکي ډلې جوړې کړي خو تر اوسه یې د یو بل سره ندي کتلي.

نړیوالې ټولنې ددې خبرو ملاتړ کړی او هیله یې ښودلې چې وبه کړی شي په افغانستان کې روانه نولس کلنه جګړه پای ته ورسوي.

XS
SM
MD
LG