د امریکا د بهرنیو چارو وزیر مایک پمپیو د منځني ختیځ یو شمیر هیوادونو ته د سفر په دوام قطر ته ورسید.
د بهرنیو چارو وزیر مایک پمپیو له قطري چارواکو سره په بیلابیلو برخو کې د تړونونه لاس لیک کولو ترڅنګ د افغانستان د سولې په هکله هم خبرې وکړې.
قطر ته تر رسیدو وروسته پمپیو وویل دده لپاره د ویاړ ځای دی چې د امریکا او قطر ترمنځ د ستراتیژیکو اړیکو په دویم پړاو کې ګډون کوي.
پمپیو وايي"د امریکا متحد ایالتونه او قطر په ګډه د افغانستان او عراق په ګډون د یو شمیر امنیتي ننګونو په هکله کار کوي. زموږ دفاعي اړیکې پراخې، مهمې او د پراخیدو په حال کې دي".
د پمپیو په وینا چې اوس په قطر کې ۱۳۰۰ امریکايي او د ایتلاف سرتیري د متحدینو د دفاع او د داعش پروړاندې د جګړې لپاره میشت دي.
د ۲۰۱۷ کال په جون کې بحرین، مصر، سعودي عربستان او متحده عربي اماراتو له قطر سره د سیاسي اختلاف له کبله اړیکې پریکړې.
ټاکل شوې د امریکا د بهرنیو چارو وزیر له قطر څخه وروسته سعودي عربستان ته سفر وکړي.
په ورته وخت کې د امریکا د بهرنیو چارو وزیر په افغانستان کې د قاطع ماموریت له قوماندان سکاټ میلر سره هم په متحده عربي اماراتو کې لیدلي دي.
د بهرنیو چارو وزیر په ټویټ کې ویلي سکاټ میلر سره یې په افغانستان کې د امریکايي پوځي او ملکي کارکوونکو په هکله خبرې کړي چې څنګه کولای شي د زلمي خلیلزاد په مشرۍ د پخلاینې له بهیر څخه ملاتړ وکړي.
د یو بل خبر له مخې په ازبکستان کې د هند او مرکزي آسیا هیوادونو ترمنځ د اړیکو پراخولو په موخه غونډه وشوه.
د هند او مرکزي آسیا هیوادونو ترمنځ په غونډه کې دا ځل افغانستان ته هم بلنه ورکړل شوې ده.
د هند د بهرنیو چارو وزیرې سوشما سوراج له خپل افغان سیال صلاح الدین رباني سره هم کتلي دي، او په افغانستان کې د سولې، امنیت او ثبات ټینګیدو څخه ملاتړ کړی دی.
سوشما سوراج وايي"هند ددغه دیالوګ له لارې د افغانستان د سولې، امنیت او ثبات لپاره ملاتړ ته ژمن دی، ترڅو د افغانانو په مشرۍ او د افغانانو تر څار سوله ټینګه او د افغانستان بیاپخلاینې او اقتصادي بیارغونې سره مرسته وشي".
د هند د بهرنیو چارو وزیره وايي چې له افغانستان او مرکزي آسیا سره له پیړیو راپدیخوا اړیکې لري، له یو بل سره راحت دي او طبعیي شریکان دي.