د لاس رسي وړ اتصالات

آیا صلاح الدین رباني له دولتي الوتکې د حزبي فعالیت لپاره کار واخیست؟


ښاغلی رباني د ملي پوځ په الوتکه کې بدخشان ته ولاړ چې د خپل پلار د تلین او د جمعیت اسلامي د ګوند په مراسمو کې برخه واخلي

د افغانستان د شفافیت د څار ډله وايي حکومت باید دا وضاحت ورکړي چې ښاغلی رباني بدخشان ته د پوځ الوتکه د ګوندي ګټو لپاره کارولې کنه.

د دغې ادارې اجرايي مشر سید اکرم افضلي امریکا غږ اشنا ته وویل که ښاغلی رباني د ګوندي او شخصي کار لپاره بدخشان ته د پوځ په الوتکه کې تللی وي، دا "فساد" دی.

د جمعیت اسلامي ګوند مشر او د افغانستان د بهرنیو چارو سرپرست وزیر صلاح الدین رباني چې د دوشنبې په ورځ (د اکټوبر ۱۶) د ملي پوځ په الوتکه کې بدخشان ته ولاړ چې د خپل پلار د تلین او د جمعیت اسلامي د ګوند په مراسمو کې برخه واخلي.

ښاغلی ربانی پداسې حال کې چې د جمعیت اسلامي د ګوند مشري کوي، چې د ملي یووالي د حکومت د باندنیو چارو وزیر هم دی.

د شفافیت د څار د ادارې اجرایي رئیس وویل "افغان حکومت داسې یوه تګلاره نلري چې د زورواکانو له لوري په شخصي او ګوندي چارو کې د ملي او حکومتي امکاناتو د کارولو مخه ونیسي. زورواکانو تل له حکومتي امکاناتو شخصي او ګوندي استفاده کړې ده".

ښاغلي افضلي وویل باید حکومت د ښاغلي رباني له لوري د حکومتي امکاناتو د کارولو په اړه سپیناوي ورکړي.

د افغانستان د دفاع وزارت یو چارواکي چې نه یې غوښتل نوم یې خپور شي امریکا غږ ته وویل "هر کله چې د کابینې وزیرانو او نورو چارواکو ته ضرورت پیدا شي، د الوتکو غوښتنه کوي، خو نه وايي چې دا الوتکه د شخصي ګټو لپاره غواړي که د حزبي یا شخصي ګټو لپاره".

بدخشان ته د افغان پوځ په الوتکه کې د ښاغلي رباني پر سفر د ټولنیزو رسنیو ځینو فعالانو هم نیوکې او تبصري کړي دي.

د فیسبوک دغه کاروونکي لیکلي که کوم اروپايي وزیر دا کار کړی وای، په سبا به له دندې شړل کېده.

په همدې حال کې د افغانستان د ولسي جرګې غړی عبدالقیوم سجادي وايي له حکومتي امکاناتو څخه په لویه پیمانه ناوړه ګټه اخیستل کیږي او حکومت له اداري فساد سره د مبارزي کومه ښکاره تګلاره نلري.

​امریکا غږ هڅه وکړه چې په دې اړه د ښاغلي رباني او یا د افغانستان د ملي امنیت د شورا نظر واخلي، خو ونه توانېده او یا هغوې ونه غوښتل چې په دې اړه خبرې وکړي.

د جمعیت ګوند ویاند واقف حکیمي له امریکا غږ سره په اول سر کې په دې اړه د خبرو ژمنه وکړه، خو وروسته بیا له څو پرله پسې تماسونو سره سره هغه ځواب ونه وایه.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG