د لاس رسي وړ اتصالات

روسیه د افغان چارواکو له 'بې بنسټه تورونو' اندیښمنه ده


په کابل کې د روسیې سفارت وايي له طالبانو سره د روسیې د مرستو خبره بې اساسه ده

په کابل کې د روسیې سفارت یوار بیا ویلي چې مسکو له طالبانو هیڅ ډول ملاتړ نکوي.

د ځینو افغان چارواکو پرله پسې تورونو او نیوکو چې ګواکې مسکو له طالب جنګیالیو سره تجهیزاتي مرستې کوي، په کابل کې د روسیې سفارت اندیښمن کړی دی.

سفارت په یوې اعلامی کې ویلي چې دا "ادعاوې واقعیت نلري او بې بنسټه دي".

په دې وروستیو ځینو افغان چارواکو ادعا کړې وه چې د وسله والو طالبانو په لیکو کې یو شمېر روسان د ډاکټرانو او انجینرانو په جامه کې لیدل شوي دي.

په کابل کې د روسیې سفارت په ځانګړي ډول د کندهار د امنیې قومندان جنرال رازق، د اروزګان د امنیې قومندان جنرال سنګري او د ۲۱۵ قول اردو د مشر جنرال احمدزي هغه تورونه رد کړي چې وايي د طالبانو په لیکو کې روسیي مشاوران فعالیت کوي.

څو ورځې مخکې د بلخ والي عطا محمد نور په یوه غونډه کې طالبان په څو برخو ووېشل او وویل چې هر هېواد د وسله والو طالبانو یوه ډله تمویلوي.

که څه هم ښاغلي نور د روسیې نوم وانخیست خو وویل چې یو شمېر ناپېژندل شوې الوتکې په شمال کې طالبانو ته مرستې رسوي.

د روسیې سفارت دا ډول تورونه رد کړي او ویلي دي چې باید د ناپېژندل شویو الوتکو په اړه له هغو خلکو پوښتنې وشي چې د افغانستان د هوايي حریم کنترول یې په لاس کې دی.

خو له دې هر څه سره سره افغان حکومت په رسمي ډول دغه ادعاوې نه دي تاید کړي. د افغانستان د بهرنیو چارو وزارت دا خبره کړې ده چې له پاکستان پرته تقریبآ نور ټول ګاونډیان له افغانستان سره ښه روابط لري.

په همدې حال کې د امریکا د دفاعي استخباراتو د ادارې مشر ونسن ستیورټ د امریکا قانون جوړوونکو ته ویلي سره له دې چې له طالبانو سره د روسیې د مرستې نښې نښانې لیدل شوي، خو لا امریکايي چارواکو کوم فزیکي شواهد نه د موندلی.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG