د لاس رسي وړ اتصالات

پر اوکراین د روسیې تر برید څو ساعته وروسته عمران خان د پوتین سره وکتل 


د پاکستان صدراعظم عمران خان چې د یو رسمي سفر لپاره مسکو ته تللی، پر اوکراین یاندې د روسیې د برید څخه څو ساعته وروسته یې د روسیې د ولسمشر ولادیمیر پوتین، سره ولیدل، تر اوسه ددغو دوو مشرانو د بحث په اړه جزییات ندي خپاره شوي.

روسیې ته د عمران خان سفر چې په څه دپاسه تیرو دوو لسیزو کې مسکو ته د پاکستان د مشر لومړنی سفر دی شاوخوا دوه میاشتې مخکې پلان شوی و او ټاکل شوې وه چې د پاکستان د انرژۍ په اړتیاو متمرکز اوسي.

عمران خان د چهارشنبې په ورځ مسکو ته د خپل دوه ورځني سفر په لومړۍ ورځ د بې نومه سرتیري پر مقبره د ګلانو ګیډۍ کښیښوده.

د امریکا د بهرنیو چارو وزارت ویاند ند پرایس، وویل چې واشنګټن روسیې ته د عمران خان د سفر په اړه خبر و او پر اوکراین باندې د روسیې د برید په اړه یې خپل دریځ له هغه سره شریک کړی دی: "هغوی ته مو د جګړې پر ځای د دپلوماسۍ د پرمخ بیولو لپاره د خپلو هڅو په اړه تشریحات ورکړل."

ښاغلي ند پرایس، د چهارشنبې په ورځ فبرورۍ ۲۳ وویل: "باور لرو چې د هر مسول هیواد مسولیت په ټوله نړۍ کې دی چې د هغه څه په وړاندې د خپل مخالفت غږ پورته کړي چې پوتین یې د اوکراین لپاره په ذهن کې لري."

ښاغلي پرایس وویل چې د دموکراتیک او سوکاله پاکستان سره مشارکت اساسي دی او په وینا یې کله چې د ګډو ګټو بحث رامنځته کیږي، د نړۍ هر هیواد باید "د پر مصرفه جګړې نه کرکه، د بې ثباته کوونکې جګړې نه کرکه" په څرګنده او په پرته له ابهام ژبې د روسیې سره په خپلو تعاملاتو کې په ډاګه کړي.

ویل کیږي چې د عمران خان او ولادیمیر پوتین د خبرو په اجندا کې د افغانستان او پدې هیواد کې د طالبانو د واکمنۍ په اړه ګډې اندیښنې او همداشان د سیمه ییزې امنیتي همکارۍ بحث شامل دي.

د روسیې سره د پاکستان اړیکې په څو وروستیو کلونو کې غښتلي شوي که څه هم چې روسیه د پاکستان د ګاونډي او سیال هیواد هند سره هم ژورې او لرغونې اړیکې لري.

په څو وروستیو کلونو کې روسي او پاکستاني پوځیانو څو ځلې ګډ پوځي تمرینونه کړي دي.

XS
SM
MD
LG