د لاس رسي وړ اتصالات

په بګرام کې د ناټو ځواکونو په کاروان ځانمرګی برید شوی


طالبان وايي برید دوې کړی دی

د افغانستان په پروان کې چارواکي وايي یو ځانمرګي د قاطع ملاتړ ماموریت د ځواکونو په کاروان برید کړی دی.

په افغانستان کې د قاطع ملاتړ ماموریت وايي چې په برید کې د دوی یو شمېر سرتېري او ولسي خلک ژوبل شوي دي. د دوی اعلامیه وايي چې ژوبل شوي سرتېرې بګرام هوايي اډې ته د درملني لپاره استول شوي او وضعیت یې ښه دی.

د دغه ولایت د امنیې قومندان جنرال محمد زمان مموزي امریکا غږ اشنا ته وویل چې بریدګر د بګرام ولسوالۍ په قلعه نصرو کې خپل موټر د بهرنیو ځواکونو له کاروان سره وجنګوه.

نوموړي وویل د ابتدايي معلوماتو له مخې په دغه برید کې درې ملکي وګړي ژوبل شوي دي. د بګرام ولسوال عبدالشکور قدوسي وايي شاید په برید کې بهرنیو ځواکونو ته هم تلفات اووښتي وي.

هغه وویل له برید وروسته د بهرنیو ځواکونو هیلکوپترونه راغلل او په سیمه کې ښکته شول چې ممکن "خپل زخمیان او وژل شوي یې" انتقال کړي وي. مګر تراوسه د قاطع ملاتړ ماموریت په دې اړه څه نه دي ویلي.

طالبانو د برید مسولیت اخیستی دی. د دغې ډلې یو ویاند ذبیح الله مجاهد په خپل ټویټر کې لیکلي دي چې په برید کې یې یو شمېر بهرني ځواکونه وژلي او ژوبل کړي دي.

د چهارشنبې په ورځ ( سپتمبر۶) د بګرام هوايي ډګر مخې کې په یو ځانمرګي برید کې یو افغان ژباړن ووژل شو، شپږ بهرنیان او څلور افغان ملکیان ژوبل شول.

XS
SM
MD
LG