د تاجیکستان د بهرنیو چارو وزارت د بدخشان په ولایت کې د شخړو په اړه د طالبانو حکومت ته رسمي یادښت استولی دی او له دې کبله یې ورته خپل اعتراض څرګند کړی دی.
په یادښت کې ویل شوي چې د دغو شخړو له کبله د تاجیکستان هوايي حریم مات شوی، د استوګنو سیمو ته یې زیان رسېدلی او یو وګړی یې وژل شوی دی.
په دغې اعلامیې کې چې یوه کاپي یې د ازادۍ راډیو ته رسېدلې ده، ویل شوي: "د تاجیکستان سرحد ته نږدې وسله والو شخړو د دغو سرحدي سیمو امنیت ګواښلی دی او نړیوال قوانین یې مات کړي دي."
په یادښت کې د طالبانو له حکومت څخه غوښتل شوي دي، چې د تاجیکستان سرحدونو ته درناوی وکړي او په اینده کې د دا ډول سرغړونو د مخنیوي لپاره اقدامات وکړي.
د تاجیکستان ځينو رسنیو راپور ورکړی دی چې له افغانستان څخه په یو توغول شوي توغندي کې د هغه هېواد د دروازدشتک په سیمه کې یوه ښځه وژل شوې دي.
د طالبانو حکومت لا تر دې دمه په دې اړه څه نه دي ویلي.
له څو ورځو راهېسې په بدخشان کې د یو سیمه ایز قومندان جمعه خان فاتح او طالبانو د ځواکونو ترمنځ د شخړو او دواړو خواو ته درانه زیانونونو د اوښتو راپورونه ورکول کېږي.
په یو تازه خبر کې د طالبانو حکومت په بدخشان کې د یو څرخي الوتکې د غورځېدو خبر ورکړی دی. طالبان وايي چې الوتکې د برېښنا له یوې پايي سره ټکر کړی او غورځېدلې ده، خو ځېنې راپورونه وايي چې دا الوتکه وېشتل شوې ده.
په همدې حال کې تېره ورځ د بدخشان په مرکز فیض اباد کې په یوې چاودنې کې د طالبانو ښاروال عبدالرحمن منصور ووژل شو.
فورم \ دبحث خونه