په کندهار ښار کې نن د جمعې د لمانځه پر وخت د مرکزي امام بارې مخ ته د موټر سایکل بم په چاودنه کې ۳ تنه ټپیان شوي.
د کندهار د والي ویاند عزیز احمد عزیزي اشنا راډیو ته وويل چې له چاودېدونکو توکو ډک موټرسائکل د امام بارې په پارکینګ کې چاودنه کړې.
دی زیاته وي چې د پېښي په لومړیو کې دوه تنه ټپیان روغتون ته انتقال شوي.
عزیز وويل:"څو شېبې مخکې د لومړۍ ناحيې اړوند د امام بارې مخ ته د موټر سایکل بم چاودنه شوې او ۲ تنه پکښې ټپیان شوې نور جزیات به وروسته له رسنیو سره شریک شي."
ده وويل چې امنیتي ادارې د پېښي د څرنګوالي په اړه تحقیقات کوي.
مرکزي امام باره د لومړۍ ناحيې په اړوند سیمه کې موقعیت لري چې د ښار تر ټولو مرکزي سیمه بلل کیږي.
بلي خواته د پېښي عیني شاهدان وايې چې په پېښه کې ۳ تنه ټپیان شوي.
د پېښي یوه عیني شاهد مرتضی اشنا راډیو ته وويل چې د جمعې د لمانځه تر اداینې وروسته لمونځ کوونکي د تګ په حال کې وو چې چاودنه رامنځ ته شول.
ده زیاته کړه چې له پېښې څخه ۳ تنه ټپیان میرویس حوزوي روغتون ته لیږدول شوي.
دا په کندهار کې پر اهل تشیع باندې د خپل ډول لومړنۍ پېښه ده چې رامنځته کیږي.
په کندهار کې اهل تشیع تر ډېره په لومړۍ ناحیه کې اوسیږي او لویه جامع يې د مرکزي امام بارې په نوم شهرت لري.
تر اوسه چا د دې بريد مسئولیت په غاړه نه دی اخیستی.
