د امریکا د بهرنیو چارو وزیر مارکو روبیو د چهارشنبې په ورځ د (اکتوبر ۲۱مه) د هند لوېدیځ ښار جامنګر ته رسېدلی دی.
د روبیو دغه سفر په داسې وخت کې ترسره کېږي چې امریکا هڅه کوي د هند د ریلاینس انډسټریز شرکت وهڅوي چې په خپلو کورنیو تصفیه خونو کې د وینزویلا د خامو تېلو تصفیه زیاته کړي او ښايي په وینزویلا کې د تېلو تولید هم پیل کړي.
د متحدو ایالتونو د بهرنیو چارو وزیر مارکو روبیو په دوه ورځني سفر هند ته تللی او ټاکل شوې چې هندي چارواکو او سوداګرو سره وګوري.
د معلوماتو پر اساس په دغو کسانو کې د میلیاردر موکېش امباني نوم هم شامل دی، چې د ریلاینس انډسټریز شرکت مشر دی. دغه شرکت د نړۍ تر ټولو لوی د تېلو د تصفیې کمپلکس اداره کوي.
ښاغلي روبیو ویلي: "ریلاینس یو ډېر مهم شرکت دی او د انرژۍ د تصفیې فوقالعاده ظرفیت لري. "
روبیو په خپلو خبرو کې زیاته کړې چې تر هغې چې خام نفت تصفیه نشي، ګټور محصول نه شي کېدای.
روبیو وايي: "موږ فکر کوو چې ریلاینس کولای شي له هند سره مرسته وکړي چې د خپلې اکمالاتي ځنځیر او انرژۍ د سرچینو تنوع نوره هم زیاته کړي. "
مارکو روبیو په خپلو خبرو کې زیاته کړې چې ریلاینس د هغو ګوتو په شمېر شرکتونو څخه یو دی چې په متحدو ایالتونو کې یې د تېلو د تصفیې په ظرفیت کې پانګونه کړې ده. دې شرکت په امریکا کې د تصفیې د ظرفیت د زیاتولو لپاره پانګونه کړې ده.
د متحدو ایالتونو د بهرنیو چارو وزیر وايي: "مناسبه مو وګڼله چې د دوی له تاسیساتو لیدنه وکړو او یو څه وخت ورسره په دې خبرې وکړو چې څنګه خپلې همکارۍ لا نږدې کولای شو، په ځانګړې توګه د لوېدیځې نیم کرې د انرژۍ د هغو سرچینو په برخه کې چې دلته تصفیه کېدای شي. "
دا په داسې وخت کې چې د متحدو ایالتونو د بهرنیو چارو وزیر مارکو روبیو د سې شنبې په ورځ (اکتوبر ۲۰) وویل چې امریکا او هند د سوداګرۍ د یو تړون لاسلیک کولو ته نږدې شوي دي.
روبیو دا څرګندونې هند ته د خپل دوه ورځني سفر په پیل کې وکړې. هغه د ممبۍ په ښار کې له خپل هندي سیال سوبرامانیم جېشنکر سره تر کتنې وروسته ډاډ څرګند کړ چې دا تړون به "ډېر ژر" بشپړ شي.
فورم \ دبحث خونه