دیني عالمان مثال ورکوي چې په شرعي نصوصو کې یادونه شوې چې که په کومه سیمه کې وبا ګډه شي نور خلک باید دغه سیمې ته ورنه شي او که د وبا په سیمه کې وي باید ترې ونه ووځي، دوي استدالال کوي چې د غه خپله د وقایې په معنا ده.
د کندوز یو دیني عالم عبدالغیاث حنفي وايي چې د سالمې کورنۍ په خاطر باید اولادونه صحتمند و روزل شي: هغه وویل: "په یو میکروب بل میکروب له منځه وړل کیږي دا روا عمل دی، د واکسین په اړه د ډاکټرانو نظر مهم دی، او تداوي کول سنت طریقه ده، او پولیو هم مرض دی او واکسین یې مکروب دی نو د مکروبو په ذریعه د نورو مکروبو له منځه وړل کم شرعي ممانعت نه لري. د قوي انسان صفت په احادیثو کې هم راغلی او کورنۍ که د اولادونو د سالم صحت خیال ونه ساتي او ماشومان معیوب لوی شي نو نه یې ځان ته ګټه رسیږي او نه یې ټولنې ته بلکه د کورنۍ او ټولنې د اوږو بار کیږي."
د کندوز د کتلوي معافیت امر غلام جیلاني عطايي وايي هغه ماشومان چې له واکسین څخه پاتي کیږي، نو د پولیو ویروس ځان ور رسوي او ماشوم به معلول رالویږي: " کوم ماشوم چې له واکسین څخه پاتي شي نو کیدای شي چې ګوزڼ شي او په ګوزڼ اخته شي، له یوې خوا دغه ماشوم د کورنۍ او له بل پلوه د ټولنې د اوږو بار کیږي، او له دې پرته یې ضرر نورو ماشومانو ته رسیږي او بل چا ته یې د ګټې پر ځای تاوان رسیږي."
د کندوز تن اوسیدونکی زلمی وايي چې د کورنۍ مشران باید د کورنۍ د غړیو په اړه د مسولیت احساس وکړي: " که د یوې کورنۍ ماشوم په پولیو اخته کیږي هغه نه یوازې دا چې د کورنۍ د اووږو بار کیږي بلکه تاوان یې ټولنې ته هم رسیږي، د همدغه ماشوم چې ګوزڼ وهلې رالویول د هغه تربیه کول، او هغه ښوونځي ته لیږل هغه چارې دي چې هم ماشوم او هم کورنۍ له ستونزو سره مخ کولای شي. "
دیني عالمان وايي چې د مرض د تداوۍ لپاره د ډاکټرانو نظریات مهم دي، هغه څه چې د یو مرض مخنیوی پرې کیدای شي استعمال یې شرعي ممانعت نه لري.
