په پاکستان کې د طالبانو د منګولو نه ژغورل شوی کاناډایي جاشوا بویل وایي د حقاني شبکې جنګیالو د یرغمل په مهال نه یوازې د هغه یوه ماشومه لور وژلې بلکه د هغه په میرمن یې جنسي تیری هم کړی دی.
کاناډا ته د رسیدو په مهال د تورنټو په هوایي ډګر ښاغلي جاشوا خبریالانو ته د خپل اوږدمهاله یرغمل کیسه کړې ده او طالبان یې د "احقمانو او شیطانانو د ډلې" په نوم یاد کړي دي.
طالبانو سره د بند په مهال د جاشوا میرمن کتلین کولمن درې ماشومان زیږولي.
جاشوا ویلي هغه او میرمن یې غوښتل د افغانستان په هاغو سختو سیمو کې د خلکو مرسته وکړي چې نه حکومت او نه غیر دولتي سازمانونه ورتلای شي.
جاشوا بويل او د هغه میرمن کتلین کولمن په ۲۰۱۲ کال کې افغانستان کې د سیلانیتوب پر مهال وسله والو طالبانو تښتولي وو.
دغه دواړه پنځه کاله د طالبانو سره په بند کې وو او په روانه اونۍ کې په پاکستان کې د هغه هیواد امنیتي قواو د امریکا د متحده ایالاتو د استخباراتي معلوماتو په بنسټ د یرغمل کوونکو له منگلو وژغورل.
ناپیلې منابع وایي چې دا ښځه او میړه د حقاني ډلې طالبانو یرغمل کړي وو، خو د پاکستان پوځ دا نه وايي چې دا کورنۍ د حقاني ډلې لخوا برمته شوې وه. پاکستان په رسمي توگه ویلي چې دغه کورنۍ يې د ترهګرو له منګلو خوشې کړې ده.
ددغه دوو بهرنیانو د خوشې کیدو په اړوند د پاکستان د حکومت په رسمي بیان کې او خبریالانو ته ددې هیواد د چارواکو په څرگندونو کې تضاد لیدل کیږي.
د پاکستان د بهرنیو چارو وزارت ویاند نفیس زکریا رسنیو ته ویلي چې د امریکا د استخباراتي معلوماتو وروسته يې دغه کسان د پاکستان قبایلي سیمې کرمه ایجنسې کې ژغورلي دي.
خو یو شمیر باوري امنیتي چارواکو د امریکا غږ ډیوه رادیو خبریال ته ویلي چې دغه ښځه، میړه او د دوي اولادونه د خیبر پښتونخوا کوهاټ ښار نه ۱۵ کلومټره جنوب غربي اړخ ته په نوي کلي کې د امنیتي ځواکونو او استخباراتي ادارو د ګډو عملیاتو په وخت ازاد شوي دي.
د پاکستان په رسمي دریځ کې یو بل توپیر دادی چې وایي دا برمته شوي کسان یې د پوځي عملیاتو په ترڅ کې راخوشې کړیدي، خو سپینه ماڼۍ او د امریکا د بهرنیو چارو وزارت ددغه کورنۍ د خوشې کیدو په برخه کې د کومو پوځي عملیاتو یادونه نه ده کړې او یواځې یې د پاکستان نه مننه کړې ده.
