د لاس رسي وړ اتصالات

امریکا د خپلو اټومي بمونو شمیر روښانه کړ


په اوهایو ایالت کې د یورانیمو د تولید فابریکه

د امریکا د بهرنیو چارو وزارت له څلورو کلونو وروسته د لومړي ځل لپاره د سه شنبې په ورځ اکټوبر ۵ (تلې ۱۳) د خپلو اټومي کوپړیو شمیر روښانه کړ.

د امریکا پخواني جمهور رئیس ډانلډ ټرمپ ددغه هیواد د اټومي کوپړیو د شمیر په اړه چوپتیا غوره کې وه.

امریکایي پوځیانو د ۲۰۲۰ میلادي کال د سپټمبر تر ۳۰ پورې ۳۷۵۰ فعالې او غیر فعالې اټومي‌ کوپړۍ درلودې چې دا شمیر د ۲۰۱۹ کال د سپټمبر د ۳۰ په پرتله ۵۵‌ او د ۲۰۱۷ کال د سپټمبر د ۳۰ په نسبت ۲۷ کوپړۍ کموالی ښکاره کوي.

له ۱۹۶۷ میلادي کال وروسته چې د امریکا متحده ایالتونو او د پخواني شوروي اتحاد ترمنځ سړه جګړه اوج ته رسیدلې وه، دا شمیر د امریکا د اټومي کوپړیو تر ټولو لږ شمیر ښکاره کوي. په ۱۹۶۷ میلادي کال کې په مجوع کې ۳۱ زره و ۲۵۵ اټومي کوپړۍ موجودې وې.

د امریکا د اټومي کوپړیو په اړه شمیرې د سه شنبې په ورځ په داسې حال کې خپرې شوې چې د جوبایډن حکومت له روسیې سره د وسلو د کنټرول مذاکرات له سره پیلوي ، هغه مذاکرات چې د ټرمپ د حکومت پرمهال له بندون سره مخ شوي وې.

د امریکا د بهرنیو چارو وزارت د یوې اعلامیې په خپرولو سره ویلي‌ دي چې د اټومي کوپړیو د ذیرمو په اړه شفافیت د وسلو د پراخیدو د مخنیوي او د اټومي بې وسلې کونې لپاره ځانګړې ارزښت لري.

د ستکهلم د سولې د نړیوالو څیړنو د انستیتوت د راپور له مخې چې د ۲۰۲۱ کال په جنوري میاشت کې خپور شو، د امریکا د بهرنیو چارو وزارت خپلې تقاعد شوي اټومي کوپړۍ حساب کړي ندي چې په مجموع کې د امریکا د ټولو اټومي کوپړیو شمیر ۵۵۵۰ ته رسیږي.

د یاد راپور له مخې، روسیه ۶۲۵۵، چین ۳۵۰ ، بریټانیا ۲۲۵ او فرانسه ۲۹۰ اټومي کوپړۍ لري.

په دې راپور کې زیاته شوې چې هند، پاکستان، اسرائیل او شمالي کوریا په مجموع کې ۴۶۰ اټومي کوپړۍ لري.

XS
SM
MD
LG