ګریتا تنبرګ د اقلیم د بدلون لپاره د پوهاوي یوه پيژندل شوې څیره ده چې کمپاین یې نړیواله بڼه غوره کړې ده.
ګریتا چې اوس ۱۶ کلنه ده، یو کال وړاندې د اقلیم بدلون ته د سویډن د حکومت د پام اړولو لپاره لاس په کار شوه. هغه به هره ورځ د سویډن پارلمان د ودانې په مخکې کښیناستله او په لاس کې به یې ځینې پاڼې نیولې وې. ګریتا په دغو پاڼو کې داسې لیکلي وو "د اقلیم په ملاتړ د ښوونځي لاریون".
د ورځو په تیریدو سره د نورو ښوونځیو زده کوو هم ددې هیواد په نورو برخو کې ورته لاریونونه پیل کړل او وروسته دوي ټولو د (اقلیم په ملاتړ د ښوونځي لاریون) تحریک جوړ کړ.
د دغه تحریک غړو زده کوونکو وروسته په ګڼو ښارونو کې په یو وخت لاریونونه وکړل چې د نړیوالو رسنیو پام يې ځان ته واړولو.
د ټایمز مجلې د راپور په اساس په هغه ورځ چې ګریتا په ۲۰۱۸ کال کې د اقلیم د بدلون لپاره د ملګرو متلونو په کنفرانس کې برخه اخیستې وه، د هغې د تحریک په ملاتړ ټوله نړۍ کې نږدې یو میلیون ماشومانو د اقلیم بدلون لپاره لاریون کړی و.
ګریتا همداراز په لندن کې د ۲۰۱۸ کال د اکتوبر په میاشت کې د انګلستان پارلمان مخې ته په یو لاریون کې برخه واخیستله.
هغې د تیډ ټاکس ستاکهولم TEDxStockholm کې هم د ۲۰۱۸ کال د نومبر په ۲۴ نیټه خبرې وکړې او د اقلیم د بدلون په اړه یې خپل پیغام شریک کړ. ګریتا په دغه غونډه کې وویل چې ”د اقلیم د بدلون لپاره ټول قوانین ستونزې لري او باید په کې تغیرات راوړل شي”.
ګریتا وایي چې د خپلې مبارزې لپاره یې له هغو امریکایي ځوانانو څخه ډیر څه زده کړي چې د فلوریډا په ایات کې یې د وسلو د پلور په ضد لاریونونه کړي وو.
ګریتا د روان کال د مۍ میاشت کې خپلې ټولې لیکنې او ویناوی په یو کتاب کې چاپ کړې. د هغې د کتاب نوم (هیڅ څوک د تغیر راوستلو لپاره وړوکي نه دي) دی چې ګریتا یې له پلور څخه ټولې لاسته راغلې پيسې په خیریه مرستو کې مصرف کړي او مصرفوي.