احمد ضیا مسعود وایي چې د هغو تمایلاتو له مخې چې د سولې د خبرو په برخه کې د حکومت د مخالفو وسلوالو په لیکو کې لیدل کیږي ، دی بله میاشت د مخالفو وسلوالو سره د سولې په خبرو کې د زیات پرمختګ تمه لري.
د ښه حکومتوالۍ او اصلاحاتو په برخه کې د افغانستان د جمهوررئیس ځانګړي استازي د پنجشنبې په ورځ په کابل کې د نیالګیو د ایښودلو د بهیر د پرانستلو په یوه غونډه کې خبریالانو ته وویل چې د ملي یووالي د حکومت په دننه کې مخالفینو سره د سولې د ټینګیدلو د پروګرام د پرمخ وړولو په برخه کې کومه ستونزه نشته او د ټولو ترمنځ په دې هکله یو عمومي تفاهم شته دی.
ښاغلي ضیا وویل " مونږ به انشاالله په نږدې کې د بدلونونو شاهدان اوسو او د طالبانو په لیکو کې هم خورا زیات تمایلات شته چې د خبرو میز ته راشي هیله لرم چې بله میاشت به مونږ د سولې په برخه کې د پام وړ پرمختګونو شاهدان اوسو ".
د سولې په باب مخالف نظرونه
احمد ضیا مسعود د ملي یووالي په حکومت کې د افغانستان د حکومت د مخالفو وسلوالو سره د سولې د خبرو په باب د نظر د اختلاف د نشتون په هکله دا څرګندونې په داسې حال کې کړي چې تیره سه شنبه د افغانستان د حکومت اجرائیه رئیس عبدالله عبدالله د مارشال محمد قسیم فهیم د لومړي تلین یوې غونډې ته په وینا کې یوازې هغو د حکومت مخالفینو سره د سولې او روغې جوړې د امکاناتو یادونه وکړه چې د ښاغلي عبدالله په وینا تروریستي ډلو سره خپلې اړیکې پرې کړي.
ښاغلي عبدالله وویل "که خبرو ته حاضر شي، هرکلی یې کوو، که خبرې یې وکړې، معقولیت ته یې تن ورکړ، له تاوتریخوالي یې لاس واخېست، دا د ټولو کور دی، نه غواړو چې هیڅوک دې تبعید وي، خو که څوک اوربلول د امتیاز وسیله ګرځوي، امتیاز نه ورکول کیږي".
د افغانستان د چارو څیړونکو د ښاغلي عبدالله د دغو تندو څرکندونو څخه داسې وانګیرله چې ګوندې د ملي یووالي د حکومت د مشرانو ترمنځ د خپلو مخالفو وسلوالو سره د سولې د خبرو ترسره کیدلو په برخه کې لا هم د نظر یووالي نشته دی.
د افغانستان دسیاسي چارو یو کارپوه آصف بکتاش امریکا غږ ته وویل چې دې دا ګڼي چې اوس هم د افغانستان په حکومت کې د وسلوالو مخالفانو سره د پخلاینې په برخه کې دوه نظره موجود دي.
ښاغلي بکتاش وویل " زما په عقیده مخکي له دې چي طالبانو سره مذاکرات پیل شي د ملي یووالي حکومت باید په خپلو کې اختلافات حل کړي او وروسته د اختلافاتو د حل څخه طالبانو سره مذاکراتو ته کښیني ".
آصف بکتاش وایي چې که حکومت دا کار و نه کړي نو د اختلافاتو شتون به د دې په ځای چې افغان حکومت ته ګټه ورسوي ورته به زیان ورسوي.
د طالبانو دریځ
په وروستیو اونیو کې د افغان حکومت او طالبانو ترمنځ د سولې د خبرو په باب په پرله پسې توګه په افغانستان او پاکستان کې رسنۍ خبرونه خپروي خو تراوسه طالبانو په څرګنده افغان حکومت سره د سولې د خبرو لپاره خپل چمتوالی نه دی ښودلی.
افغان حکومت د استازو سره د سولې د خبرو په باب طالبانو په یوه وروستۍ اعلامیه کې چې د تیرې اونۍ په سر کې خپره شوه ویلي چې د کومو عواملو له مخې چې طالبانو ټوپک ته لاس کړی وو هغه عوامل لا په ځای دي او افغانستان اوس هم لا د طالبانو په وینا د بهرنیو ځواکونو په اشغال کې دی.