واشنګټن وايي له اسلام آباد سره په ګډه د اړیکو په لاغښتلتیا کار کوي.
د امریکا د بهرنیو چارو وزیر ریکس تیلرسن وویل چې پاکستان د امریکا د ډاډ وړ متحد دی او واشنګټن او اسلام آباد په ګډه د اړیکو د لا ښه کولو لپاره کار کوي.
ښاغلي ټیلرسن د چهارشنبې په ورځ د پاکستان د باندنیو چارو وزیر، خواجه محمد آصف سره په یوې خبري غونډې کې وویل چې پاکستان نه یواځې د افغانستان په مسله کې بلکې د سیمې په چارو کې اساسي ونډه لري.
خو د امریکا د باندنیو چارو وزیر دا هم وویل چې واشنګټن د پاکستان د سیاسي ثبات په اړه اندیښنه لري.
د ښاغلي ټیلرسن په خبره "مونږ د پاکستان د حکومت د راتلونکې په هکله هم اندیښنه لرو. غواړو چې د هغوی حکومت باثباته وي او هغوی سوله ییز وي".
د پاکستان په اړه د ریکس ټیلرسن خبرې د امریکا د حکومت د نورو چارواکو سره یو څه توپیر لري.
ولسمشر دونالد ټرمپ او د امریکا د دفاع وزیر، جیم متیس، په پاکستان کې د اورپکو او ترهګرو ډلو د شتون له کبله اندیښنې څرګندې کړي او له پاکستاني چارواکو یې غوښتي چې د دغه راز ډلو په له منځه وړلو کې کوټلي اقدامات ترسره کړي.