د لاس رسي وړ اتصالات

د ایران "دښمن" له مظاهرو ناوړه ګټه اخیستل غواړي - خامنه يي


د ایران مذهبي مشر علي خامنه یي د شنبې په ورځ جون څلورمه (غبرګولې ۱۳) وویل "دښمن" چې هدف یې متحده ایالات دي، هڅه کوي چې د ایران اسلامي جمهوريت د کمزوري کولو لپاره له اعتراض کوونکو څخه کار واخلي.

په وروستیو اوونیو کې د ایران په څو ښارونو کې خلکو د ژوند د لګښتونو د لوړېدو او اداري فساد له امله مظاهرې زیاتې شوي دي.

د خامنه یي دغه څرګندونې وروسته له هغه وشوې چې د مې میاشتې په ۲۳مه نیټه د ایران په جنوب لویدیځ ښار آبادان کې تر کار لاندې یوه ودانۍ راوغورځیده چې له امله یې ۳۷ کسان ووژل شول.

دا پيښه د خلکو د اعتراضاتو لامل شوه او معترضینو په هغه هیواد کې د "بې کفایته" چارواکو د اعدام غوښتنه وکړه.

خامنه یي دغو اعتراضاتو ته په غبرګون کې په یوې ټلویزیوني وینا کې وویل:"دښمن د خلکو په اعتراضونو سره هیواد ته د ضربې رسولو هڅه کوي او د رواني کار او فعالیت په مرسته او په مجازي فضا او پیسو او مزدورانو په روزلو سره او نورو بیلابیلو درواغو سره هڅه کوي چې د نظام په وړاندې خلک راوپاروي."

د ایران رهبر دغه څرګندونې د هغه هیواد د پخواني رهبر روح الله خمیني د ۳۳م تلین په مناسبت په جوړو شویو مراسمو کې وکړې.

خمیني په ۱۹۷۹ میلادي کال کې د ایران د وروستي پادشاه محمد رضاشاه د نظام په ړنګولو سره په هغه هیواد کې د اسلامي جمهوري بنسټ کیښود.

خامنه یي په خپلو وینا کې وویل له دین او روحانیت او اسلامي نظام څخه د ایران د خلکو د مخ اړولو په اړه د امریکا او غرب برداشت ، د هغوی د ناسمو محاسباتو نمونه ده کوم چې پخوا یې هم دا ډول محاسبات کړي دي.

د ایران دغه جګپوړي چارواکي وویل:"د هغوی د نن محاسبات د هغوی د پخوا بشپرې غلطې محاسبې دي، کوم چې فکر یې کاوه د ایران ملت د اسلامي جمهوري پر ضد تحریک کړي."

خامنه یي د هغه هیواد په آبادان ښار کې د ۱۰ پوړیزې ودانۍ د ړنګیدو په اړه وویل، باید د آبادان د قضیې د ویجاړیو او د نورو قضایاوو عاملین مجازات شي.

په آبادان کې د سیمه ایزو چارواکو په وینا، د یاد ښار د اوسني او دوو پخوانیو ښاروالانو په ګډون ۱۳ کسان د یادې ودانۍ د ړنګیدو په ارتباط نیول شوي دي.

وروسته له هغه چې امریکا په ۲۰۱۸ کال کې په یو اړخیز ډول د ایران او نړۍ له اټومي قرار داد څخه ووتله او پر هغه هیواد یې سخت اقتصادي بندیزونه ولګول، د ایران اقتصاد له ماتې سره مخ شوی دی او پر اوکراین د روسیې له برید وروسته د نورو هیوادونو په شان په ایران کې هم د توکو بیې لوړې شوي‌ دي.

ایران په تیرو کلونو کې د ژوند کولو د مصارفو د لوړیدو له امله د پراخو اعتراضونو سره مخ شوی دی په خاص ډول کله چې په ۲۰۱۹ میلادي کال کې د تیلو قیمت لوړ شو.

ایراني چارواکو په هغه وخت کې وویل چې د مظاهرو له امله ۲۳۰ کسان ووژل شول، خو ملګرو ملتونو څرګنده کړه چې په مظاهرو کې ۴۰۰ کسانو خپل ژوند له لاسه ورکړ.

XS
SM
MD
LG