د افغانستان جمهور رئیس محمداشرف غني د لوړې له مراسمو شاوخوا اته میاشتې وروسته د خپلې کابینې غړي د چهارشنبې په ورځ د باور رایې اخیستلو لپاره ولسي جرګې ته معرفي کړل.
له ښاغلي غني سره د جمهوري ریاست دواړه مرستیالان او یو شمیر نور لوړپوړي چارواکي هم نن د اکتوبر ۲۱ (تلې ۳۰) ولسي جرګې ته د کابینې د معرفي کولو لپاره تللي وو.
ښاغلي غني د ولسي جرګې غړو ته په وینا کې وویل چې د جمهوري نظام د پیاوړتیا لپاره د حکومت او مقننه قوې ترمنځ همغږۍ او تفاهم ته اړتیا ده.
هغه وویل دا همغږي هغه مهال رامنځ ته کېږي چې د افغانستان د اساسي قانون اصولو او ضوابطو ته ژمنتیا موجوده وي.
د افغانستان جمهور رئیس زیاته کړه: "نوې کابینه له خپلواکو ادارو سره تاسې ته معرفي کوم، ستاسې له خوا د دوی په تائید سره به یو متحد ټیم ولرو چې د ملي لیدلورو په تطبیقولو کې به ما سره همکاري کوي او ملي شورا هم وشي کولای چې ورباندې حساب وکړي".
نوې کابینه په داسې حال کې ولسي جرګې ته معرفي شوې چې یو شمیر وکیلان د حکومت له خوا په ځينو وزارتونو کې د تشکیلاتو پر کمولو او د صلاحیتونو پر محدودولو انتقادونه کوي.
دوی وايي جمهور رئیس غني باید لومړی د وزارتونو د تشکیلاتو برخلیک معلوم کړي او له هغې وروسته خپله کابینه ولسي جرګې ته وروپېژني.
د افغانستان د اساسي قانون له مخې نوماند وزیران، لوی څارنوال، د ملي امنیت، مرکزي بانک او سرې میاشتې رئیسان باید له ولسي جرګې څخه د باور رایه واخلي.
د ولسي جرګې رئیس میر رحمان رحماني وویل چې دغه جرګه به د اساسي قانون او د خپل کورني اصولو له مخې په خپلو مکلفیتونو عمل وکړي.
هغه زیاته کړه: "هره اداره چې د اړتیاو په اساس نوې جوړېږي، باید د اساسي قانون د ۹۰مې مادې له مخې د ملي شورا له خوا تصویب شي".
ښاغلي رحماني وویل چې د دولت اساسي تشکیلات باید ولسي جرګې ته د تصویب لپاره واستول شي ترڅو وکیلان یې د بودجې، انکشافي پروژو د عملي کولو او تشکیلاتو په اړه تصمیم ونیسي.
ټاکل شوې چې په راتلونکې اونۍ کې د ولسي جرګې پنځه ځانګړي کمیسیونونه د نوماند وزیرانو او سرپرست رئيسانو په اړه خپل راپورونه ترتیب او له هغې وروسته به د کابینې غړي خپلې طرحې او پروګرامونه وکیلانو ته وړاندې کړي.
تیره ورځ د افغانستان د ازادو او عادلانه انتخاباتو بنسټ (فیفا) د ولسي جرګې له غړو څخه وغوښتل چې د کابینې غړو ته د رایې ورکولو پر مهال باید د هغوی تخصص ته پام وکړي.
