د لاس رسي وړ اتصالات

راشدخان بیا تاریخ جوړ کړ: ۱۹ کلنۍ کې د نړۍ وتلی بالر شو


د افغانستان د ملي لوبډلې لوبغاړی دی خو د نړۍ په مشهورو سترو تجارتي سیالیو کې لوبه کوي

د کرکټ د نړیوالې شورا د تازه درجه بندۍ په اساس د افغانستان راشد خان په یو ورځنیو نړیوالو لوبو (۵۰اورونو) کې لومړی مقام خپل کړی دی.

راشد خان همدغه راز په تاریخ کې تر ټولو ځوان لوبغاړی شو چې دغه مقام ترلاسه کوي، راشد خان دا مهال ۱۹ کلن دی.

د کرکټ د نړیوالې شورا په خپلې ویپاڼې کې په یو ورځنیو سیالیو کې د لوبغاړو تازه درجه بندي خپره کړې ده. د افغانستان راشد خان او د هند تیز بالر جسپریت بومرا د یوې ورځنیو سیالیو لومړی مقام ګټلی دی، په بله وینا دوی دواړه په لومړي مقام کې شریک دي.

راشد خان تر دې دمه د افغانستان لپاره ۳۷ یو ورځنۍ یا پنځوس اوریزه لوبې کړي او ۸۶ کسان یې سوځولي دي. ده دریو لوبو کې پنځه-پنځه کسان سوځولي دي.

د کرکټ نړیوالې شورا دا خبر په خپل ټویټر کې هم خپور کړی دی.

د راشد خان تر ټولو ښه لوبه تېرکال د ویسټ انډیز خلاف وه چې اووه لوبغاړي یې وسوځول او یوازې ۱۷ منډې یې ورکړلې. راشد خان د نړۍ څلورم بالر دی چې په یوې لوبې کې دومره کسان سوځوي.

راشد خان همدا څو ورځې مخکې د دویمې درجې هېوادونو د لوبغاړو په منځ کې د غوره لوبغاړي جایزه هم واخیسته. پر دې سربېره د کرکټ د نړیوالې شورا د درجه بندۍ له مخې راشد خان په نړۍ کې څلورم الراونډر دی، په دې مانا چې هم باولینګ کولی شي او هم بیټینګ.

راشد خان له زمبابوې سره د پنځو لوبو په سیریز کې ۱۸ کسان وسوځول او د دغې لړۍ غوره لوبغاړی هم شو.

راشد خان د افغانستان د ملي لوبډلې لوبغاړی دی خو د نړۍ په مشهورو سترو تجارتي سیالیو، آي پي ال، بګ بش، سي پي ال، بي پي ال کې هم لوبیږي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG