د بخښنې نړیوال سازمان وایي چې په افغانستان د زیاتې تراژیدۍ د مخنیوي لپاره باید نړیواله ټولنه قاطعانه عمل وکړي.
د بخښنې د نړیوال سازمان عمومي منشي اګنس کالمارد، وویل هغه څه چې په افغانستان کې پیښیږي یوه غمیزه ده؛ هغه غمیزه چې باید اټکل یې شوی وای او د رامنځته کېدو مخنیوی یې شوی وای.
هغې زیاته کړه: "په زرکونو افغانان د طالبانو د غچ اخیستنې له جدي ګواښ سره مخامخ دي."
میرمن کالمارد زیاته کړه چې له پوهانو او خبریالانو څخه نیولې د مدني ټولنې د فاعلینو او د ښځو د بشري حقونو تر مدافعینو پورې ټول د بې سرنوشتۍ له ګواښ سره مخامخ دي.
آغلې کالمارد وویل: "بهرني حکومتونه باید لازمو اقداماتو ته مخه کړي چې د هغوی مصوون وتل تضمین شي چې د طالبانو له لورې د هدف کیدو له ګواښ سره مخامخ دي. دغه اقدام کې د ویزې د بهیر چټکول، د کابل د هوایي ډګر څخه د وتلو لپاره ملاتړ، د نقل مکان او بیا میشت کولو برابرول او د اجباري ایستلو مخنیوی وشي."
هغې زیاته کړه چې د ملګرو ملتونو د امنیت شورا باید یوه بیړنی پریکړه لیک تصویب کړي او د طالبانو له ډلې څخه وغواړي چې د بشري حقونو نړیوال قانون ته درناوی وکړي او غچ اخیستونکي بریدونه ودروي.
دا پداسې حال کې دي چې د ملګرو ملتونو د امنیت شورا نن د افغانستان په هکله یوه بیړنۍ غونډه کوي.
په زرګونو افغانان د طالبانو له ویرې د کابل په نړیوال ډګر کې راټول شوي او هڅه کوي چې له هیواد څخه ووځي.
د رپوټونو له مخې لږ تر لږه پنځه تنه د کابل په هوایي ډګر کې په ګڼه ګوڼه کې مړه شوي دي.
