د افغانستان د بهرنیو چارو وزارت وایي د دیپلوماتیکي هلو ځلو له کبله د پاکستان د پوځ لخوا د افغانستان په خاورې د توغندیو بریدونه په " عاجله توګه" بند شول.
وزارت په یوې اعلامیې کې چې نن، جولای ۱۷ (چنګاښ ۲۷) خپره کړې ویلي چې د دغو توغندیو او راکټونو د بریدونو په هکله یې په کابل کې د پاکستان سفیر او د پاکستان د بهرنیو چارو د وزارت سره خپل جدي اعتراضات او اندیښنې شریکې کړي او د جدي عواقبو یادونه یې کړیده.
د بهرنیو چارو وزارت پاکستان ته ویلي چې دا شان بریدونه د دواړو هیوادونو په اړیکو منفي اغیزې لري.
د پاکستاني پوځ په بریدونو کې چې د کنړ ولایت په یو شمیر سیمو کې یې تازه کړیدي، اته عام خلک پکې وژل شوي او څو تنه ټپي شویدي. د افغانستان د بهرنیو چارو د وزارت په اعلامیې کې ویل شوي چې ددواړو هیوادونو د دفاعي چارو مسؤلین به ددې پیښو په هکله هر اړخیز تحقیقات کوي.
په راپورونو کې ویل شوي چې د پاکستان پوځ د کنړ ولایت د سرکاڼو، مروروې او مرکز اسعد آباد یو شمیر سیمې په راکټونو ویشتلي.
د پاکستان پوځ تقریباً درې کاله کیږي چې د ډیورنډ د کرښې په ۴۳۰ کیلو متره سیمې کې یې نظامي پوستې جوړوي، د اغزن تار لګوي او په یو شمیر ځایونو کې یې د خلکو د تګ راتګ د مخنیوي لپاره دروازې هم جوړې کړي.
افغانستان د پاکستان پدې اقداماتو څو څو ځله انتقاد کړی او ویلي یې دي چې دا کار د پولې دواړو غاړو ته پراته قومونه سره ویشي.