سلګونو پارېدلو مسلمانانو د پاکستان د پنجاب په ایالت کې د قران د څو پاڼو د سوځولو په تور یو مسیحی وهلی او کور یې تر لوټ تالان وروسته سوځولی دی.
پیښه د پنجاب ولایت سرګودهې ښار مجاهد کالونۍ کې شوې.
په سیمې کې د پولیسو مشر اعجاز مالهي ویلي چې قهریدلو مسلمانانو د دې مسیحي پلار هم وهلی خو پولیس پر وخت سیمې ته ورغلي او دواړه زوی او پلار یې ژغورلي دي.
د پولیسو مشر ویلي چې وضعیت تر کنټرول لاندې دی او په سیمې کې د پیښې په هکله پلټنې پیل شوي. قهریدلو خلکو د دې مسیحي د بوټانو جوړولو یوه وړه کارخانه هم په بشپړه توګه سوځولې ده.
پولیس وایي د قهریدلو کسانو د خپرولو لپاره یې په سیمې کې د مذهبي مشرانو څخه مرسته غوښتې وه. د پنجاب حکومت دا پیښه غندلې ده.
د پولیسو په اعلامیې کې ویل شوي چې په اخ او ډب کې ۱۰ امنیتي پرسونل ټپي شوي هم دي. پولیسو د ښار مسیحي میشتو سیمو ته سلګونه پولیس او نور امنیتي ځواکونه د امنیت ساتلو لپاره استولي دي.
د پنجاب ایالت یو جګپوړي افسر امریکا غږ ته ویلي چې د پیښې په تړاو نږدې ۲۰ تنه نیول شویدي او دا ژمنه یې هم کړي چې ښایي نور کسان ونیول شي.
په پاکستان کې د اسلامي مقدساتو د سپکاوي تورونه وخت ناوخت په مسیحانو لګول کیږي.
د روان کال د فبرورۍ په میاشت کې د پاکستان په لاهور ښار کې قهرجنو خلکو پر یوې ښځې له دې امله برید وکړ چې پر جامو یې لیکل شوي عربي کلیمې "ګواکې قراني ایات" دي، خو نوموړې د پولیسو په مداخله د قهرجنو خلکو له منګولو څخه وژغورل شوه.
همدارنګه د پاکستان قاضي القضات ته هم د نامعلومو سرچینو له خوا د مرګ ګواښونه وروسته له هغې وشول، چې یو کس ته یې چې د لیکلو متنو پواسطه اسلامي مقدساتو په سپکاوي تورن شوی و، د خوشي کېدو حکم صادر کړی و.
تېر کال د پاکستان د امنیتي څېړنو او مطالعاتو د مرکز غیر دولتي ادارې په یو رپوټ ویلي وو، چې د پاکستان له جوړېدو راهیسې په دغه هېواد کې لږ تر لږه ۱۴۱۵ کسان اسلامي مقدساتو ته د سپکاوي په تور نیول شوي دي، چې له دې ډلې څخه لږ تر لږه ۸۹ تنه یې بې له محاکمې د خلکو له خوا وژل شوي دي.
پاکستان کې مذهب ته سپکاوی جرم ګڼل کیږي او سزا یې اعدام دی، خو د بشري حقونو سازمانونه وایي ددغه قانون څخه اکثر د شخصي غچ اخیستنې په مقصد ناوړه استفاده کیږي.
د متحده ایالاتو د بهرنیو چارو وزارت هم تیر کال په نړۍ کې د مذهبي آزادیو په هکله په کلني راپور کې ویلي و چې په پاکستان کې اسلامي مقدساتو ته د سپکاوي په تور اکثریت بندي شوي کسان مسلمانان دي خو دا هم پکې ویل شوي چې پدې قانون کې تر ډیره مذهبي اقلیتونه په نښه شویدي.
فورم \ دبحث خونه