د لاس رسي وړ اتصالات

بخښنې نړیوال سازمان: سرپل کې دې پر یوې ښځې او دوو نجونو د جنسي تیري ادعا وڅېړل شي 


عکس:ارشیف
عکس:ارشیف

د بخښنې نړیوال سازمان په سرپل ولایت کې د طالبانو اړوند کسانو لخوا پر یوې ښځې او دوو لوڼو یې د جنسي تیري د ادعا په اړه د ژر تر ژره څېړنو غوښتنه کړې ده.

دغه سازمان ویلي پدې وروستیو کې ټولنیزو رسنیو ته یوه ویډیو را وتلې چې پکې یوه ښځه د دغه ولایت د سومه قلعه ولسوالۍ په «خانقا» کلي کې د فبرورۍ میاشتې پر ۲۸مه د هغوی په کور کې د طالبانو اړوند کسانو لخوا پر زور سره پر یوې ښځې او دوو لوڼو یې د جنسي تیري ادعا کوي.

د بخښنې نړیوال سازمان د جمعې په ورځ مارچ ۱۰ (کب ۱۹) په یوې اعلامیې کې د جنوبي آسیا برخې د څېړونکي زمان سلطاني له قوله ویلي: "د ډله ییز جنسي تیري هغه جزئیات چې پر یوې ښځې او لور یې ښکاره شوي چې ویل کیږي د طالبانو اړوند کسانو لخوا تر سره شوي، موږ به په تاریخ کې د بشري حقونو تر ټولو وحشتناکه سرغړونې شاهدان وه اوسو."

ښاغلي سلطاني زیاته کړې چې طالب چارواکي باید دغه پېښه وغندي او د یادې ادعا په اړه ژر تر ژره «خپلواکې، شفافې او بې طرفه» څېړنې تر سره کړي. د هغه په خبره د دغه پېښې عاملین باید د نړیوالو قوانینو له مخې مجازات شي.

د بخښنې نړیوال سازمان د یادې پيښې په اړه اندېښنه ښودلې ده.

د بخښنې نړیوال سازمان د جنوبي اسیا برخې دغه څېړونکې همدرانګه ویلي چې طالبانو په دغه هیواد کې د ښځو چارو وزارت او بشري حقونو خپلواک کمېسیون په ګډون ټول هغه بنسټونه چې د ښځو اړوند قضیو ته یې رسیدګي کول له منځه وړي دي.

په سرپل ولایت کې د طالبانو حکومت سیمه ییزو چارواکو تر دا مهاله د یادې مسئلې په اړه څه نه دي ویلي، خو تر دې مخکې ورته راپورونه رد کړي دي.

دا په داسې حال کې د چې تر دې مخکې د پنجشېر ولایت د پریان ولسوالۍ اوسېدونکو هم د دغه ولسوالۍ په «ده خواک» سیمه کې پر یوې ښځې د طالبانو اړوند کسانو لخوا د جنسي تیري ادعا کړې وه.

د پنجشېر لپاره د طالبانو والي ویاند ابوبکر صدیق د ډسمبر میاشتې پر دوهمه (لېندۍ ۱۲) امریکا غږ ته ویلي و چې په دې اړه له څېړنې پیل شوي دي. نوموړي زیاته کړې وه چې په تړواو یې شپږ کسان نیول شوي او څېړنې ورڅخه روانې دي.

XS
SM
MD
LG