د افغانستان د کورنیو چارو وزارت وايي، د کابل ښار لوېدیځې څنډې په شپږمه او دیارلسمه ناحیه کې د دوو غبرګو چاودنو له امله اووه تنه ملکي وګړي وژل شوي او شپږ نور ټپیان شو دي.
د کورنیو چارو وزارت مرستیال ویاند احمد ضیاء ضیاء ویلي چې دغه چاودنې نن شنبه جون ۱۲ (غبرګولې ۲۲) څه کم در بجې د شپږمې ناحیې په «مهتاب قلعه» او دیارلسمې ناحیې په «استګاه سرپل» سیمه کې پر دوو ښاري ټونس ډوله موټرو شوي دي.
د کورنیو چارو وزارت مرستیال ویاند ویلي چې د شپږمې ناحیې په چاودنه کې د یوې ښځې په ګډون شپږ ملکیان وژل شوي او دوه نور ټپیان شوي دي او د دیارلسمې ناحیې په چاودنه کې یو تن وژل شوی او څلور تنه نور ټپیان شوي دي.
تر دا مهاله د دغه چاودنو مسؤلیت کومې وسله والې ډلې نه دی منلی.
دا په روانه میاشت کې په یاده سیمه کې د ملکي وګړو پر موټرو څلورمه چاودنه ده چې رامنځته کیږي.
تر دې مخکې هم په دغه سیمه کې د ملکي خلکو پر کاسټر او ټونس ډوله موټرو چاودنو کې شااوخوا ۲۰ تنه وژل شوي او ګڼ شمېر نور ټپيان شوي و.
تېره اونۍ د افغانستان د جمهوري ریاست دوهم مرستیال سرور دانش له امنیتي ارګانونو څخه وغوښتل چې د کابل لوېدیځ کې د «نسل وژنې» مخه ونیسي.
د کابل ښار په وروستۍ چاودنه کې د مینا خیري په نوم د اریانا خصوصي تلویزیون یوه خبریاله له خپلې مور او خور سره هم ووژل شوه.
د افغانستان د جمهوري ریاست لومړي مرستیال امرالله صالح بیا په کابل ښار کې وروستیو چاودنو ته په اشارې د امنیت د ټینګښت برخه کې له عامو خلکو د همکارۍ غوښتنه کړې ده.
هغه په دې وروستیو کې ویلي چې عم خلک دي د هغو کسانو په نیولو کې همکاري وکړي چې په ښاري موټرو کې ماینونه ځای پر ځای کوي.
