د بلخ امنیتي چارواکي وايي، د دغه ولایت د بلخ ولسوالۍ د امنیه قوماندانۍ مخته د موټر بم چاودنې له امله دوه تنه افغان سرتیري وژل شوي او د ملکي وګړو په ګډون ۴۲ تنه نور سرتیري ټپیان شوي دي.
د بلخ د امنیه قوماندانۍ ویاند عادل شاه عادل امریکا غږ ته وویل چې د غه موټر بم چاودنه نن یکشنبه جون شپږمه (غبرګولې ۱۶) شاوخوا ۱۲ بجې شوې ده.
نوموړي زیاته کړه: "د چاودېدونکو موادو یو ډک موټر چې تر اوسه یې نوعیت لا معلوم نه دی، په زیات احتمال سره چې هاموي ټانګ به وي د بلخ ولسوالۍ د امنیه قوماندانۍ د ودانۍ مخته چاودنه کړې چې له امله امنیتي سرتیرو ته تلفات رسېدلي دي."
په بلخ ولایت کې د ننني موټر بم برید مسؤلیت وسله والو طالبانو منلی او د ګڼو سرتیرو د مرګ ژوبلې ادعا یې کړې ده.
ویل کیږي په دغه موټر بم چاودنه کې د سیمې خلکو ته هم ګڼ مالي زیانونه رسېدلي دي.
د یو بل خبر له مخې د افغانستان د حکومت یوې امنیتي سرچینې تائید کړې چې طالبانو د فاریاب ولایت قیصار ولسوالۍ نیولې او افغان ځواکونو ته یې مرګژوبله اړولې ده.
د افغانستان د کورنیو چارو وزارت یوه چارواکي د یکشنبې په ورځ د جون شپږمه (غويي ۱۶) امریکا غږ ته وویل چې د دغې ولسوالۍ اداره تېره شپه د طالبانو تر ولکې لاندې راغلې ده.
د فاریاب د ولایتي شورا یو شمېر غړي وايي چې طالبانو لومړی د دغه ولایت د امنیه قوماندانۍ ته نږدې موټر بم چاودنه کړې او وروسته یې د ولسوالۍ په مرکز یرغل کړی دی.
د دغې شورا غړي عبدالاحد ایلبیک خبریالانو ته ویلي چې د طالبانو په دغو بریدونو کې د قیصار ولسوالۍ د امنیه قوماندان سیفالرحمان دهزاد په ګډون ۱۴ امنیتي منسوبین وژل شوي دي.
د هغه په وینا په دغو نښتو کې طالبانو ۳۸ افغان سرتیري ژوندي نیولي دي. امنیتي سرچینو هم په دغو بریدونو کې افغان ځواکونو ته د اوښتې مرګ ژوبلې خبر تائید کړی او ویلي یې دي چې زیاتره وژل شوي کسان پولیس دي.
د فاریاب سیمهيیز چارواکو په دې اړه د معلوماتو له ورکولو ډډه کړې ده.
طالبانو ویلي چې د دغې ډلې جنګیالي د فاریاب د قیصار ولسوالۍ په مرکز کې حضور لري او د افغان ځواکونو زیاته اندازه مهمات او تجهیزات یې نیولي دي.
