چین ۶میاشتې وروسته ومنله چې هند سره جګړه کې یې څلور سرتیري وژل شوي.
د چین پوځ نن جمعه فبروري ۱۹ (کب۱) وویل چې تېرکال په همالیا کې له هند سره یې په سرحدي جګړه کې څلور سرتېري وژل شوي وو.
بیجینګ هغه وخت د هندي او چینايي سرتیرو ترمنځ په دغه لاس په لاس جګړه کې د خپلو وژل شویو سرتېرو په اړه معلومات خپاره کړي نه وو.
د چین د بهرنیو چارو وزارت ویاند هو چونېنګ وویل چې د دغه خبر خپرول ښايي له نړیوالو سره د حقایقو په درک کولو کې مرسته وکړي.
چین شپږ میاشتې وروسته دا خبر خپور کړی دی، دغه کار د دې ښکارندوی دی چې چین د مسایلو د پټولو فرهنګ لري.
هند له دغې جګړې وروسته اعلان کړی و چې ۲۰سرتېري یې وژل شوي دي. دا لاس په لاس جګړه د ۲۰۲۰د جون په میاشت کې شوې وه.
بیجینګ د خپلو عسکرو د تلفاتو خبر له نوي ډیلي سره له څو مذاکراتو وروسته خپور کړ.
راپورونه وايي چې د هند او چین ځواکونه د پانګ ګونګ د جهیل په شمال او جنوبي سیمو څخه بېرته تللي دي او د دواړو خواو پوځيمشران مذاکرات کوي چې سرتېري یې نور هم له دغو سیمو څخه شا ته ولاړ شي.
چین او هند د همالیا لانجمنو سیمو کې ۳۸۰۰کیلیو مېتر ګډ سرحد لري او دواړه خواو د پراخو سیمو د مالکیت دعوه کوي.