د لاس رسي وړ اتصالات

سعودي عربستان په حج ټول لګول شوي محدودیتونه لېرې کړل 


هر کال میلیونونه مسلمانان حج ته ځي

د سعودي‌عربستان حکومت اعلان کړی دی چې د حج سږني‌ مراسم به د کرونا ویروس د وبا تر خپرېدو مخکې حالت په څېر ترسره شي. په دې مانا چې د حاجیانو شمېر به خپل پخواني حالت ته وروګرځي.

په ۲۰۱۹ کال کې د کرونا ویروس تر خپرېدو مخکې کال کې ۲.۴ میلیون خلکو فرضي حج وکړ خو د کرونا د محدودیتونو له اعلان وروسته په۲۰۲۰ کې بیا هر څه بند شول او یوازې د سعودي عربستان ۱۰۰۰ اوسېدونکو ته د حج اجازه ورکړل شوه.

په ۲۰۲۱ کې بیا د سعودي‌ عربستان ۶۰۰۰۰ اوسېدونکو ته د حج ترتیبات ونیول شول او تېر کال دا شمېر یو میلیون ته ورسېده، خو اوس د سعودي حکومت پرېکړه کړې چې د حاجیانو شمېر خپلو پخواني‌ حالت ته وګرځوي.

د سعودي‌ عربستان د حج او عمرې وزیر توفیق بن فوزان الربیح د جدي په ښار کې تېره شپه جنوري نهمه (مرغومې۱۹) ناوخته په یو کنفرانس کې وویل: «زه تاسو ته په دې غونډې کې دوه ښه خبرونه لرم. لومړی: د حاجیانو شمېر به خپل پخواني حالت ته ګرځي او د عمر هېڅ ډول محدودیت به نه وي.»

د سعودي‌ عربستان دولتي‌ اژانس د هغه د خولې لیکلي‌ دي چې سعودي‌عربستان به په ټولو هېوادونو کې د حج په شرایطو برابر جواز لروونکو شرکتونو ته اجازه ورکوي چې حج ته د خلکو د استولو په چارو کې برخه واخلی.

په تېرو کالونو کې د ۱۸ او ۶۵ کالونو ترمنځ مسلمانانو ته د حج کولو اجازه ورکول کېده او همدغه راز د هغو خصوصي‌شرکتونو شمېر یې هم محدود کړی و چې له نورو هېوادونو څخه یې به یې خلک حج ته انتقالول، خو د کرونا ویروس له خپرېدو وروسته ډېر مسائيل تغیر شول.

مقامات وايي چې د کرونا ویروس لومړنۍ وبا نه ده چې د حج مراسم یې ګډ وډ کړي او محدود کړي وو بلکې تر دې مخکې هم دا ډول وباو د حج په موسم کې خلک مړه کړي‌ او دا مراسم یې خراب کړي دي.

د اسوشیتډپرس د راپور په اساس په ۶۳۲ کې خلک د ملاریا له کبله وکړېدل او ورنځېدل، په ۱۸۲۱ کې کولرا بیا د حج په موسم کې شاوخوا ۲۰۰۰ کسان مړه کړل او په ۱۸۶۵ د کولرا یوې بلې څپې هم ۱۵۰۰۰ کسان مړه کړل.

د سعودي‌ حکومت د حج د مراسمو په مهال د ناروغیو د خپرېدو د مخنیوي لپاره یو لړ محدودیتونه لګولي او له هغو خلکو چې صحي حالت یې ښه نه وي او عمر یې ډېر وي غوښتې چې د حج په مراسمو کې ګډون ونکړي. همدغه راز د کرونا ویروس په مهال یې یو لړ قوي بندیزونه او محدودیتونه هم ولګول.

XS
SM
MD
LG