د ګلبدین حکمتیار په مشرۍ اسلامي حزب په یوه اعلامیه کې چې د دغه ګوند اړوند د شهادت ورځپاڼې په ټویټر پاڼه خپره شوې ویلي، چې د اسلامي حزب په مرکزي دفتر د جمعې په ورځ غرمه مهال دوه تنو وسله والو برید وکړ، چې دواړه بریدکوونکي خپل هدف ته د رسیدلو وړانډې د امنیتي ساتوونکو له خوا له منځه وړل شوي دي.
اسلامي حزب ته نږدې سرچینو ویلي، چې دوه تنو وسله والو د جمعې په ورځ ډسمبر دویم ( لیندۍ ۱۱) شاوخوا یوه نیمه بجه غوښتل د کابل ښار په شپږمه حوزه کې د اسلامي حزب مرکزي دفتر جومات ته ځانونه ورسوي، چې د امنیتي ساتوونکو له خوا پیژندل شوي او د امنیتي ساتوونکو په متقابلو ډزو کې دواړه بریدګر وژل شوي دي.
همداشان په دې نښته کې د اسلامي حزب د مشر ګلبدین حکمتیار دوه ساتوونکي هم ټپیان شوي دي.
د اسلامي حزب په اعلامیه کې ویل شوي، چې په دې برید کې د ګلبدین حکمتیار په ګډون د دغه حزب هیڅ کوم چارواکي ته زیان نه دی رسېدلې. همداشان د ګلبدین حکمتیار لمسي عبیدالله بهیر د خپل ټویټر په پاڼه لیکلی چې ښاغلی حکمتیار ته په دې برید کې زیان نه دی رسیدلي.
د اسلامي حزب یو چارواکي غیرت بهیر د فرانسې خبري آژانس ته ویلي دي چې دوه برید کوونکي هغه مهال ووژل شول چې غوښتل یې ددې ګوند د کابل ودانۍ ته ننوځي. د هغه په وینا دریم کس په تېښته بریالی شو.
د فرانس پرس د رپوټ له مخې ددې حوزې د پوليسو يو جګپوړي افسر عبيدالله مدبر هم د دوو بريدګرو وژل کېدل تاييد کړل، خو ویلي یې دي چې د ده په اند درېيم بریدګر نيول شوى دى.
اسلامي حزب ته نږدې سرچینو امریکا غږ ته وویل، چې د بریدکوونکو هدف د اسلامي حزب د مرکزي دفتر په جومات کې پر لمونځ کوونکو باندې برید و. ددغو سرچینو د وینا پراساس ګلبدین حکمتیار او د اسلامي حزب نور غړي هره جمعه په همدې جومات کې د جمعې د ورځې لمونځ ادا کوي.
ټاکل شوې چې اسلامي حزب مشر به په دې اړه ژر یو پیغام خپور کړي. د طالبانو د حکومت د کورنیو چارو وزارت لا تراوسه ددې برید په اړه رسنیو ته څه نه دي ویلي.
تراوسه کوم چا یا ډلې ددې برید مسولیت نه دی اخیستی.