د پښتو ژبې د ستر شاعر، لیکوال او انقلابي شخصیت خوشحال خان خټک د شخصیت لمانځلو علمي سیمینار، چې څلور ورځې یې دوام وکړ نن پنجشنبهپه ارګ کې د د افغانستان د جمهور رئیس محمد اشرف غني په وینا پای ته ورسید.
ښاغلي غني، خوشحالخان خټک د پښتو ادب د تاریخ بنسټګر وباله او وې ویل، هر هغه څوک چې پښتو لیکي او لولي خامخا به دغه ستر شاعر او لیکوال ته مراجعه کوي.
جمهور رئیس غني وویل، چې د خوشحال فکر، هنر او شخصیت نه یوازې د ده د ماحول محصول دی، بلکې له ټول اسلامي فرهنګ سره تعلق لري.
هغه زیاته کړه "خوشحال په تاریخي لحاظ د ستر اسلامي تمدن یو لوې وارث دی خوشحال د شکسپیر غوندې ستر شاعر او هنر مند دی، خو د شاعري سربیره د قوم مشري هم ورپه غاړه ده. دده ارزوګانې میرویس نیکه عملي کړې او احمدشاه بابا یې د تکمیل هڅه وکړه".
د خوشحال خان خټک څلور ورځیني علمي سیمینار کې دکوزې او برې پښتونخوا ګڼو نوموتوشاعرانو، لیکوالانو او څیړونکو برخه اخیستې وه.
له کوزې پښتونخوا څخه راغلی شاعر او لیکوال اباسین یوسفزي د خوشحال خان خټک د شخصیت په اړه وو یل "خوشحال د افغان وطن د اسمان داسې ځلنده لمر دی، چې زموږ د سیمې په هر غره څیره وهي، تودوخي یې هر پښتون ته رسي او شغلې یې ټوله نړۍ لیدی شي".
د غونډې په پای کې جمهور ریس غني وویل، چې د افغانستان حکومت به په نیږدې وخت کې د یو بل کلاسیک نامتو شاعر حمید مومند د قبر د ودانۍ کار پیل کړي.
هغه همدارنګه مالیې وزارت ته لارښوونه وکړه، چې په پیښور کې په افغان بلډنګ کې دې د مشاعرو او ادبي فعالیتونو لپاره یو ځانګړی ځای جوړ کړي.
ددې ترڅنګ یې د افغانستان علومو اکاډمۍ ته وویل، چې د پښتونخوا او کوټې د لیکوالو او ادیبانو د آثارو په چاپولو کې دې فعاله برخه واخلي.
خوشحال خان خټک نیږدې څلور سوه کاله مخکې د پښتونخوا په اکوړې خټک کې زیږدلی دی، چې د عمر په اتیا کلن مزل کې یې شاوخوا دوه سوه د نظم او نثر کتابونه لیکلي دي.
هغه له خپلې مورنۍ ژبۍ پښتو سربیره په فارسي او عربي ادب کې هم برلاسي لرله.