د لاس رسي وړ اتصالات

امریکا په "اشتباهي عملیاتو" کې د افغان پولیسو وژنه تائید کړه


امریکایي سرتیري په افغانستان کې

امریکایي پوځیانو د افغانستان په هلمند ولایت کې په هوایي عملیاتو کې په سهوه د افغان پولیسو وژل کیدل تائید کړل.

دغه پیښه د پنجشنبې په شپه د هلمند مرکز لشکرگاه ښار ته نژدې شوې ده. د رپوټونو له مخې پدې پیښه کې ١٧ افغان پولیس وژل شوي دي.

د امریکایي ځواکونو ویاند وویل عملیات وروسته له هغې وشول چې افغان ځواکونو ترې د هوایي ملاتړ غوښتنه وکړه.

په افغانستان کې میشت د امریکایي ځواکونو یو ویاند ډیگ بټلر د اسوشیتد پرس اژانس ته ویلي دي چې ددغو هوایي عملیاتو څخه دمخه په سیمه کې افغان هم آهنگ کوونکو قواو په ساحه کې د افغان ځواکونو د نه شتون په هکله دوی ته ډاډ ورکړی و.

ښاغلي بټلر وویل: "خو متاسفانه داسې نه وه او یوه غمیزه رامنځ ته شوه. مونږ ددغې پیښې د څیړلو په حال کې یو چې څنگه ناسم اطلاعات مونږ ته رسیدلي دي تر څو په راتلونکې کې ددې ډول پیښو مخنیوی وشي."

د هلمند د ولایتي شورا رئیس عطاالله افغان، هم دغه پیښه تائید کړې او ویلي یې دي چې د وژل شویو پولیسو سربیره پدې پیښه کې د پولیسو ١۴ منسوبین ټپیان شوي هم دي.

د هلمند والي محمد یاسین، ویلي دي چې ددې پیښې د عواملو په هکله پلټنې کوي.

د امریکایي ځواکونو هوایي بریدونه چې معمولا د افغان ځواکونو په غوښتنه کیږي په دې وروستي یو کال کې زیات شوي دي.

خو هوایي بریدونه په یو شمیر مواردو کې د افغان امنیتي ځواکونو د وژنې سبب کیږي چې په جنگي ساحو کې د یاغیانو سره په جگړه بوخت وي.

XS
SM
MD
LG