د لاس رسي وړ اتصالات

د پاکستان پارلمان ښایي د شنبې په ورځ د صدراعظم عمران خان برخلیک وټاکي 


د پاکستان پارلمان

ټاکل شوې چې د پاکستان پارلمان به د شنبې په ورځ غونډه وکړي چې د هغه هیواد صدراعظم عمران خان د ګوښه کولو په اړه رایه ورکړي. د جمعې د ورځې اپریل اتمې (وري ۱۹) د رسمي خبرتیا له مخې ښایي د هغه د مشرۍ موده به لنډه شي.

د پاکستان سترې محکمې د پنجشنبې په ورځ ناوخته پریکړه وکړه چې خان باید د عدم اعتماد رایې سره مخامخ شي؛ کوم چې تمه کیږي هغه به واک له لاسه ورکړي، پدې معنی چې هغه به له دندې ګوښه کړای شي.

د پاکستان د پارلمان رئیس دفتر امر کړی چې ولسي جرګه د شنبې په ورځ د سیمې په وخت د سهار په ۱۰:۳۰ بجو غونډه وکړي. رایه اچونه د اجندا څلورمه موضوع ده چې د مخالف ګوند د مشر شهباز شريف لخوا وړاندیز شوې.

د کرکټ ورزش پخوانی ستوری عمران خان، چې په ۲۰۱۸ کې یې دنده پیل کړه، ټاکل شوې وه چې د جمعې په ورځ وروسته ملت ته وینا وکړي. هغه د سترې محکمې د پنجشنبې د ورځې له حکم وروسته وویل چې "زما پیغام زموږ ملت ته دا دی چې زه به تل د (پاکستان) لپاره تر وروستي توپ پورې مبارزې ته دوام ورکوم."

د ښاغلي خان د حکومت یو غړي د سترې محکمې پریکړه غندلې چې د عدم اعتماد د رایې د مخنیوي لپاره د صدراعظم هڅې شنډې کړې.

د پاکستان د بشري حقونو د چارو وزيرې شيرين مزاري په خپل ټويټر ليکلي: "تېره شپه قضايي کودتا وشوه... د پارلماني برتري ختمه شوه!"

د پاکستان سترې په خپل حکم کې ویلي چې عمران خان د بې اعتمادۍ د رایې په مخنیوي کې غیرقانوني عمل کړی چې د تیرې یکشنبې په ورځ ترسره کیدله او وروسته یې پارلمان منحل کړ او ټاکنې یې وبللې.

دا حکم د پاکستان په کړکیچ کې وروستی پړاو و چې ددغه ۲۲۰ میلیون نفوس لرونکي هېواد سیاسي او اقتصادي ثبات یې له ګواښ سره مخ کړی؛ په هغه هیواد کې چې د خپل تاریخ نیمایي واکمني یې د پوځ په واک کې وه.

عمران خان، چې په افغانستان کې د امریکا په مشرۍ د مداخلې مخالف و او د صدراعظم کیدو وروسته یې د روسیې سره یې اړیکې پیاوړې کړې، متحده ایالاتو یې د هغه د ګوښه کولو لپاره د یوې دسیسې په ملاتړ کولو تورن کړي دي. واشنګټن دغه تورونه په کلکه رد کړي دي.

که ښاغلي خان ته د نه باور رایه ورکړل شي، د حکومت مخالف ګوند به د صدراعظمۍ لپاره نوماند وړاندې کړي.

د پخواني لومړي صدراعظم نواز شریف کشر ورور شهباز شریف، د محکمې له پرېکړې وروسته ویلي، چې که عمران خان له واکه لیرې شي، اپوزیسیون هغه د واک د ترلاسه کولو لپاره نومولی دی.

ناڅرګندتیا پای ته رسول؟

د پاکستان روپۍ د پنجشنبې په ورځ د بل هر وخت څخه راټیټه شوه او د بهرنیو اسعارو زیرمې کمې شوې.

د پاکستان مرکزي بانک د پنجشنبې په ورځ د سود نرخ ۲۵۰ پوائنټونه لوړ کړ چې دا د ۱۹۹۶ راهیسې ترټولو لوی اقدام دی.

په کراچۍ کې د ټاپ لاین سیکیورټیز په نامه د پولي معاملاتو مشورتي کمپنۍ څخه محمد سهیل رویټرز اژانس ته ویلي چې: "د محکمې پریکړه به تر ډیره حده سیاسي ناڅرګندتیا او د اساسي قانون کړکیچ پای ته ورسوي. دا به په بازارونو کې د اعتماد په رامنځته کولو کې مرسته وکړي."

هغه زیاتوي چې: "که څه هم اقتصادي ننګونې پاتې دي او دا به په زړه پورې وي چې وګورو چې نوی تنظیم څنګه د شیانو د تنظیم کولو لپاره زړور ګامونه پورته کوي."

اپوزیسیون ویلي چې دوی وختي ټاکنې غواړي خو یوازې د خان له سیاسي ماتې وروسته او د قانون تصویبولو وروسته چې د دوی په وینا اړتیا ده چې ډاډ ترلاسه شي تر څو راتلونکې ټاکنې ازادې او عادلانه وي.

د ټاکنو کمیسیون ویلي دي چې کولای شي ټاکنې د اکتوبر په میاشت کې ترسره کړي، دا پدې معنی دي چې هر نوی حکومت به تر هر څه مخکې له اقتصادي ستونزو سره لاس او ګریوان وي.

XS
SM
MD
LG