د پاکستان د بشري حقونو وزیرې شیرین مزاري نن پنجشنبه د ( لیندۍ/ قوس ۱۵) په ټویټر لیکلي : " دا ۱۸ بهرنۍ خیریه مؤسسې باید وایستل شي، دوی باید د ټاکل شويو هدفونو له مخې کار کړای وای چې ویې نه کړ".
اسوشیتید پرس خبري آژانس د خبر له مخې اکثره دا مؤسسې چې ایستل کیږي امریکايي دي او یو شمیر نور یې په بریټانیا یا نورو اروپايي هیوادونو کې میشت دي، خو ددغو مؤسسو نوملړ لا تراوسه اعلان شوی نه دی.
لږترلږه نور ۲۰ خیریه مؤسسې هم له پاکستان څخه د ایستل کیدو له خطر سره مخ دي. پاکستاني چارواکو څو میاشتې مخکې پرته له دې چې وضاحت ورکړي په پاکستان کې میشت ۳۸ خیریه مؤسسو ته خبر ورکړ چې خپل فعالیتونه ودروي.
د پاکستان د مرستو د بنسټ ویاند عمیر حسن ویلي دا ۱۸ خیریه مؤسسې په پاکستان کې د ۱۳۰ میلیون ډالرو په ارزښت ۱۱ میلیون بې وزله پاکستانیانو ته مرستې رسوي.
ښاغلی حسن وايي چې هیڅ یوې دغې مؤسسې ته معلومات ورکړل شوې نه دي چې ولې ایستل کیږي.
اسوشیتید پرس خبري آژانس د راپور له مخې په پاکستان کې داسې انګیرنې شته چې د امریکا متحده ایالات او یو شمیر اروپايي هیوادونه د مرستې رسولو په نوم خپل جاسوسان پاکستان ته لیږي.
وروسته له هغې د امریکا استخباراتو په پاکستان کې د واکسین لګولو د پروګرام یوه پاکستاني کارکوونکي په همکارۍ د اسامه بن لادن پټنځای پیدا کړ، پاکستان د مرستې رسولو بهرنیو مؤسسو پر فعالیت جدي څار کوي او د زیات شمیر فعالیت یې ځنډولي دي.
پاکستانی ډاکتر شکیل افریدي چې د اسامه بن لادن د پټنځای څخه د ډي این ای نمونه یې د امریکا متحدو ایالتونو په واک کې ورکړې وه، اوس په پاکستان کې بندي دی.
که څه هم د پاکستان د پوځ ویاند آصف غفور ویلي چې د ۱۸ خیریه مؤسسو د ایستلو پریکړه د اسامه بن لادن له وژل کیدو سره تړاو نه لري، خو زیاته کړې ده چې دغو مؤسسو د فعالیت لازم معیارونه پوره کړې نه دي.
