د لاس رسي وړ اتصالات

ارزګان کې د پولیو ویروس شتون د ماشومانو ژوند ګواښي


انځور: آرشیف

د ارزګان ولایت روغتیايي مسؤولین په دې ولایت کې د پولیو ویروس شتون تاییدوي او وایي چې که چیرې ماشومان په ټاکلي وخت واکسین نشي، ښایي په راتلونکي کې د ګوزڼ ناروغۍ پېښې زیاتې شي.

دوی وایي چی که څه هم په دې وروستیو کې په ارزګان کې د پولیو کومه پېښه نده ترسترګو شوې، خو په تېرو کلونو کې په پرله پسې توګه له واکسین څخه د ماشومانو د پاتې کیدو له امله د پولیو څو مثبتې پېښې لیدل شوي، چي د پولیو وېروس په شتون دلالت کوي.

د ارزګان د عامې روغتیا ریاست د کتلوي معافیت مسؤول، محمد رفیق امریکا غږ ته وویل: ”اوس مهال په ارزګان کې د پولیو کومه نوې پېښه نلرو، خو په چاپیریال کې د پولیو وېروس شتون لري. په هغو ولسوالیو کې چې کور په کور کمپاین ندی ترسره شوی، لکه د شهید حساس ولسوالۍ، د پولیو ناروغۍ د ګواښ کچه لوړه ده.“

نوموړي زیاته کړه: ”موږ هڅه کوو چې په راتلونکي کې کور په کور کمپاین ترسره کړو، تر څو زموږ چاپیریال په بشپړه توګه د پولیو له ویروس څخه پاک شي او ماشومان په ګوزڼ ناروغۍ اخته نشي.“

روغتیاپالان وایي چې له ګوزن څخه د خلاصون یوازنۍ لاره تر هر ماشوم پورې د پولیو ضد واکسین رسول دي، خو له بده مرغه چې دغه موخه لاتر اوسه نده تر لاسه شوې.

بل لوري ته د ارزګان ولایت ځینې اوسیدونکي وایي چې ماشومان یې له بیلابیلو ناروغیو سره مخ دي، او له روغتیایي مسؤولینو غواړي چې د دغو نارغیو د مخنیوي لپاره اړین ګامونه پورته کړي.‌

د ارزګان اوسیدونکي، رحیم‌الله امریکا غږ ته وویل: ”زموږ ماشومان په بیلابیلو ناروغیو لکه خوارځواکي او شري اخته دي، چې د هرې ورځې په تیریدو سره ېې پېښې زیاتیږي.“

د ګوزڼ پر ضد د مبارزې نړیوالې روغتیایي ادارې په دوامدار ډول د عامې روغتیا له وزارت سره همکاري کوي، تر څو په افغانستان کې د پولیو ناروغي په بشپړه توګه له منځه یوسي، او له کورنیو غواړي چې په کمپاینونو کې خپل ټول له پنځو کالو څخه کم عمره ماشومان واکسین کړي.

XS
SM
MD
LG