د لاس رسي وړ اتصالات

پاپ فرانسیس: د خدای په نوم تاوتریخوالی لوی کفر ویل دي 


پاپ فرانسیس عراق ته تللی

د کاتولیک مسیحیانو مذهبي مشر پاپ فرانسیس عراق ته د خپل سفر پر مهال ویلي دي چې د خدای په نوم تاوتریخوالی «لوی کفر ویل» دي.

نوموړي د یکشنبې په ورځ مارچ ۶ (کب۱۶) دعراق د نینوا په ښار کې په یوې کلیسا کې عراقي مسیحیان وهڅول چې د داعش له لوري له دوی سره شوې بي عدالتۍ وبخښي.

دا کلیسا د موصل ښار په ۳۲کیلومترۍ کې ده چې یو مهال د داعش ډله په کې حاکمه وه او غوښتل یې مسیحیان هلته تس نس کړي.

د عراق په شمال کې ډېر مسیحیان اوسیږي او په ځینو سیمو کې د داعش د ظلم او جبر له کبله له خپلو سیمو تښتېدلي وو. پاپ دغه څرګندونې د بغدیدا ښار په کلیسا کې وکړې، هغه ځای چې د داعش ډلې تقریبآ په بشپړ توګه ویجاړ کړی و.

پاپ فرانسیس وویل: « ښايي د بشپړ رغېدلو لاره ډېره اوږده وي، خو زه له تاسو غواړم لطفآ مه مایوسه کیږي. موږ باید د بخښلو وړتیا ولرو او تر ټولو مهمه دا چې د نه تسلیمېدو مېړانه ولرو.»

واتیکان په عراق کې د مسیحیانو د خوندي ساتلو هلې ځلې کوي چې ویل کیږي د عیسی مسیح له مهال راهېسې هلته ژوند کوي.

په ۲۰۰۳کې د صدام حسین د رژیم له پرځېدو وروسته هلته د مسیحیانو شمېر نژدې نیم میلیون و، خو اوس څو سوه زرو ته رسېدلی دی.

پاپ تېره ورځ د اور یا تل المقیر تاریخي ښار لیدو ته هم تللی و. دا د حضرت ابراهیم د زېږېدو ښار بلل کیږي.

هغه وویل: « زموږ د پلار ابراهیم له دغه ټاتوبي عقیده ټوکېدلې ده. اجازه راکړئ چې تاکید وکړم چې خدای بخښونکی او مهربان دی او تر ټولو لوی کفر ویل دا دي چې موږ د خدای په نوم له خپلو خویندو او وروڼو څخه کرکه او نفرت وکړو.»

هغه په عراق کې د شیعه ګانو له یو مشهور مذهبي مشر ایت الله علي سیستاني سره هم ولیدل. یو شمېر په دې باور دي چې دا ډول ملاقاتونه د دینونو ترمنځ خبرو اترو او زغم او حوصلې ته لار پرانیزي.

په عراق کې د پاپ د سفر پر مهال ډېر امنیتي تدابیر نیول شوي او په ځینو هغو ځایونو کې چې پاپ تګ راتګ کوي، ټانګونه درول شوي دي او لارې تړل شوي دي.

XS
SM
MD
LG