د لاس رسي وړ اتصالات

پرایس: پاکستان د ترهګریزو بریدونو په وړاندې د ځان د دفاع حق لري


د امریکا د بهرنیو چارو وزارت ویاند ند پرایس

د متحدو ایالتونو د بهرنیو چارو وزارت ویاند ند پرایس د سه شنبې په ورځ جنوري دریمه (مرغومي ۱۳) وویل پاکستان حق لري چې د ترهګریزو بریدونو په وړاندې د ځان دفاع وکړي.

د امریکا د بهرنیو چارو وزارت دغه چارواکي دا څرګندونې وروسته له هغه وکړې چې د پاکستان نظامي او سیاسي رهبري وویل، هیڅ هیواد اجازه نلري هغو ترهګرو ته پناه ورکړي چې له هغه ځایه پر پاکستان بریدونه وکړي.

د پاکستان د ملي امنیت د کمیټې دا څرګندونې افغانستان ته د نوموړي اشاره وه، هغه ځای چې اسلام آباد ادعا کوي پاکستاني طالبانو ته یې پناه ورکړې. خو د طالبانو حکومت دا څرګندونې نه مني.

ښاغلي پرایس د خبریالانو د یوې پوښتنې په ځواب کې وویل:" موږ د پاکستان د ملي امنیت د کمیټې له وروستۍ اعلامیې خبر یو. د پاکستان خلک له تروریستي بریدونو څخه ډیر ځوریدلي دي. پاکستان حق لري چې د ترهګرۍ په وړاندې له ځان څخه دفاع وکړي."

د امریکا د بهرنیو چارو وزارت دغه چارواکي‌ همدارنګه له طالبانو وغوښتل چې د ترهګرۍ په وړاندې د مبارزې په برخه کې په خپلو ژمنو ودریږي.

ښاغلي پرایس زیاته کړه:"موږ همدارنګه له طالبانو غواړو په هغه ژمنه چې کړې یې ده ودریږي څو نور د افغانستان له خاورې‌ څخه هیڅ وخت د نړیوالو ترهګریزو بریدونو د ترسره کیدو د ځای په توګه کار وانه خیستل شي. دا هغه ژمنې دي چې طالبانو تر نن ورځې پورې ندي عملي کړي او یا یې د ترسره کیدو لپاره علاقه مندي نده ښکاره کړې."

د پاکستان سیاسي او نظامي رهبري په داسې حال کې په ضمني شکل د افغانستان په خاوره کې د ترهګرو ډلو په وړاندې د بریدونو د احتمال خبره کړې چې د تیر کال په نومبر میاشت کې د پاکستان له حکومت سره د پاکستاني طالبانو د اوربند له پای ته رسیدو وروسته یادې ډلې د هغه هیواد پر امنیتي ځواکونو بریدونه ډیر کړي دي.

د پاکستان د ملي‌ امنیت په کمیټه کې دا اعلان له اوږدو غونډو وروسته وشو کوم چې د یاد هیواد صدر اعظم شهباز شریف، د وسله وال پوځ لوی درستیز عاصم منیر او نورو جګپوړو چارواکو ګډون درلود.

د یاد هیواد د حکومت په اعلامیه کې ویل شوي چې دې کمیټې په غونډې کې هوډ څرګند کړ چې په پاکستان کې د ترهګرۍ لپاره "هیڅ زغم نلري" او دا چې د جنګیالیو په خلاف جګړې کې به د دولت د بشپړ ځواک څخه کار واخیستل شي.

تر دې مخکې د پاکستان د کورنیو چارو وزیر رانا ثنا الله د ډسمبر په ۲۹ نیټه له ایکسپریس نیوز سره په مرکه کې ویلي چې که هیواد یې د تحریک طالبان پاکستان په څېر ډلو له خوا وګواښل شي، اسلام اباد قانوني واک لري چې په افغانستان کې دننه د یاغیانو د پټیدو ځایونو پر ضد اقدام وکړي.

ثنا الله د دې پوښتنې په ځواب کې چې که افغان طالبان په افغانستان کې دننه د پاکستاني طالبانو د پټیدو خوندي ځایونو پر ضد اقدام ونه کړي، ایا اسلام اباد به په افغانستان کې دننه د دغې ډلې پر ضد اقدام وکړي، وویل چې ددې ډول ستونزې د رامنځته کیدو په صورت کې "موږ لومړی د افغانستان د مسلمان او ورور ملت څخه غواړو جې دغه پټنځایونه له منځه یوسي او کسان یې مونږ ته راوسپاري" لخو که دغه ډول اقدام ونه شي پاکستان به اقدام وکړي.

د طالبانو د حکومت دفاع وزارت د جنوري‌ په لومړۍ نیټه د پاکستان د کورنیو چارو وزارت ددې څرګندونو په غبرګون کې د یوې اعلامیې په خپرولو سره خبرداری ورکړ چې افغانستان "بې صاحبه ندی" او چمتو دی چې له خپلې ځمکنۍ بشپړتیا څخه دفاع وکړي.

د پاکستاني چارواکو څرګندونو په خاص ډول د افغانستان په خاوره کې د پاکستاني طالبانو پر ضد د بریدونو د ترسره کیدو په اړه د نوموړي هیواد د ملي امنیت د کمیټې څرګندونو، د افغانستان د پخواني ولسمشر حامد کرزي غبرګون راپارولی دی.

ښاغلي کرزي ددې څرګندونو په غبرګون کې وویل : "د پاکستان خلک د افغانستان همسایه وروڼه دي خو د پاکستان اوسني حالات او نا امنۍ تر ډېره د پاکستان د حکومت د خپلو پالیسیو نتیجه ده.“

حامد کرزی له نا امنۍ سره د موثرې او اغېزمنې مبارزې لپاره د پاکستان له حکومت څخه غواړي چې د خپلو تېرو څو لسیزو پالیسي باندې له سره عمیق غور وکړي او بدله یې کړي، له تهدید او زور زیاتي ډډه وکړي او په سیمه کې د سولې او ثبات د ټینگښت لپاره، له افغانستان سره د متمدنو او نېکو اړیکو لار خپله کړي.

کرزي کله چې د افغانستان ولسمشر هم وو څو ځله د پاکستان حکومت ترهګرو ته د پناه په ورکولو، تمویل، تجهیز او زده کړو تورن کړی وو، خو د پاکستان د هغه وخت چارواکو تل د کرزي دا تورونه رد کړي وو.

بلخوا د پاکستان پولیس او امنیتي چارواکي وایي یو وسله وال کس د سه شنبې په ورځ جنوري دریمه (مرغومي ۱۳) د هغه هیواد په پنجاب ایالت کې د استخباراتو دوه افسران ووژل او له سیمې وتښتید.

د پاکستان د پنجاب ایالت د خانیوال ناحیې د پولیسو یو جګپوړي مشر مرتضی بهاټي وویل چې دا برید هغه مهال وشو چې دغو دوو استخباراتي افسرانو غوښتل خپل موټر په یو پارکینګ کې ودروي.

ددغو دوو افسرانو د وژل کیدو مسولیت چې د طالبانو او نورو اورپکو په نیول کیدو مشهور وو، تر اوسه چا پر غاړه ندی اخیستی.

XS
SM
MD
LG