د افغانستان د مالیې سرپرست وزیر ډاکټر همایون قیومي د سې شنبې په ورځ (نومبر۱۳) په واشنګټن ډي.سي کې د افغانستان په سفارت کې د محدودو نړیوالو رسنیو سره خبرې وکړې.
د مالیې سرپرست وزیر وایي، د تېرو دری کالو راهیسې افغانستان د اوکراین د ستونزې قرباني شو او روسیې په سیمه کې منفي نقش غوره کړې دی.
ښاغلي قیومي دا وضاحت ورنه کړ چې ولې افغانستان د اوکراین قرباني شو؟
د مالیې سرپرست وزیر او د جمهور رئیس اشرف غني اقتصادي سلاکار وویل دا څرګنده ده چې د افغانستان سره به مادي مرستې کمېږي، خو هغه بودیجوي پلان چې د افغانستان دولت جوړ کړې، ډاډه دی چې د مرسته کوونکو هېوادونو لخوا به ومنل شي.
د ښاغلي قیومي په وینا دا مالي کمک به ځکه د مرستندویانو لخوا ومنل شي چې افغان دولت خپله بودیجه په داسې کورنیو سرچینو مصرفوي چې عواید ترې ترلاسه کېږي.
ښاغلي قیومي د امریکا غږ د پوښتنو په ځواب کې وویل چې سوله د افغانستان اړینه غوښتنه ده، خو یوه ریښتینې سوله هغه وخت تامین کېدلی شي چې د پاکستان په څير ګاونډي هېوادونه د ترهګرو د حمایت او تخنیکي همکاریو لاس واخلي.
ښاغلي قیومي وویل د پاکستان ځواکمنه اردو لاهم د هغو ترهګرو ملاتړ کوي چې د افغانستان د دولت سره جنګېږي.
د قیومي په باور جمهور رئیس ډونالد ټرمپ د افغانستان یو ښه متحد دی او د افغانستان او جنوبي آسیا لپاره د امریکا ستراتیژۍ ډېر مثبت اغېز کړی دی.
هغه وویل د امریکا ستراتیژي به په سیمې کې د اوږدې مودې لپاره د امن او ثبات سبب شي، خو په دې شرط چې ولیدل شي د سیمې ځنې هېوادونه لکه پاکستان د جنوبي اسیا لپاره د ولسمشر ټرمپ د ستراتیژۍ په عملي کېدو کې څومره صادقانه همکاري کوي.
د افغانستان حکومت د سولې په پروسه کې له طالبانو سره د مخامخ خبرو هرکلی کړی او وایي، د دولت او طالبانو ترمنځ په هر ډول خبرو کې هېڅ ډول شرط مخکې له مخکې نږدي.
