د لاس رسي وړ اتصالات

راشد خان: خوشحال یم چې په ۲۰اوریزو لوبو کې مې ۱۰۰ کړه


راشد خان د شل اورویزو سیالیو په درجه بندګۍ کې د نړۍ اول بالر دی

د افغانستان د کرکټ د ملي لوبډلې د لوبغاړي راشد خان د ۲۰ اورونو سیالیو او لوبو شمېر ۱۰۰ ته ورسېده.

په دې کې د راشد خان نړیوالې او نورې تجارتي سیالۍ شاملې دي چې د افغانستان د ملي لوبډلې او خپلو نورو ټیمونو لپاره یې کړي‌ دي. راشد خان د افغانستان لپاره تر دې دمه د ۲۰ اورونو ۲۹ نړیوالې لوبې کړي‌ دي.

راشد خان په خپل ټویټر کې لیکلي دي "ډېر خوشحاله یم چې د ۲۰ اورونو په سلمه لوبه کې د لوبې غوره لوبغاړی شوم." راشد خان په افغانستان او نړۍ کې له خپلو ټولو مینوالو مننه کړې چې هغه ستايي او ملا یې تړي.

راشد دا مهال په هند کې د آی پي ال په سیالیو کې د سنرایزر حیدراباد سره لوبیږي چې د شنبې په ورځ (مۍ۵) د ډیلي ډرډیولز خلاف لوبې کې غوره لوبغاړی شو. هغه په څلورو اورونو کې ۲۳ منډې ورکړې او په مهم وخت کې یې دوه کسان وسوځول.

دا درېیم ځل دی چې راشد خان په سږني آی پي ال کې د لوبې غوره لوبغاړی کیږي. راشد د ۲۰ اورونو په ۱۰۰ لوبو کې تر دې دمه (یکشنبه مۍ۶) ۱۴۷ کسان سوځولي‌ دي. یو ورزشي ویبسایټ کرکټرکر د راشد خان د ۱۰۰ لوبو ریکارډ خپور کړی دی.

راشد خان پر آی پي ال سربېره د بګ بش، بي پي ال او سي پي ال په ۲۰اوریزو تجارتي سیالیو کې هم لوبیږي او په برتانیا کې یې هم له یو کلپ سره تړون لاسلیک کړی دی چې د ۲۰ اورونو سیالیو ته ورشي.

راشد خان د ۲۰ اورنو په نړیوالو لوبو کې د نړۍ اول توپ اچوونکی دی. هغه همدغه راز تر ټولو ځوان توپ اچونکی دی چې په یوې ورځنیو نړیوالو کمو لوبو کې ۱۰۰ ویکټې اخلي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG