د لاس رسي وړ اتصالات

راشد خان بل ریکارډ جوړ کړ؛ ۱۰۰ ویکټې یې واخیستې


راشد خان دا مهال د کرکټ د نړیوالې شورا په درجه بندۍ کې د ۵۰ او ۲۰ اورونو د سیالیو اول بالر دی

راشد خان د نړۍ او افغانستان لومړنی توپ اچوونکی شو چې په کمو یوې ورځنیو نړیوالو لوبو کې ۱۰۰ کسان سوځوي.

راشد خان د یکشنبې په ورځ (مارچ۲۵) د زمبابوې د هراره په میدان کې له ویسټ انډیز سره د نړیوال جام د غوراوي سیالیو په پایلوبه کې دا ریکارډ جوړ کړ.

هغه په خپلې څلور څلوېښتمې (۴۴مې) لوبې کې دا کارنامه وکړه. سلم کس چې راشد خان وسوځوه د د ویسټ‌ انډیز هوپ و.

راشد خان همدغه راز د کرکټ په تاریخ کې تر ټولو ځوان لوبغاړی و چې په کمو لوبو کې یې ۵۰ ویکټې اخیستې وې یانې ۵۰ کسان یې وسوځول.

راشد خان د یوې ورځنیو نړیوالو سیالیو په یوې لوبې کې څلور وارې پنځه-پنځه کسان او څلور وارې - څلور-څلور کسان سوځولي دي. د راشد خان د کرکټ تر ټولو غوره توپ اچونه تېرکال د ویسټ انډیز خلاف وه چې په یوې لوبې کې یې اووه کسان وسوځول او یوازې ۱۸ منډې پرې وشوې.

راشد خان لا هم ۱۹ کلن دی او دا کارنامه یې د کرکټ په تاریخ کې او د افغانستان لپاره د خپل ډول لومړنۍ ده. د ملي‌ لوبډلې کپټان اصغر ستانکزي تر لوبې یوه ورځ مخکې وویل چې د راشد خان دا ریکارډ د ټول افغانستان لپاره مهم او ویاړ دی.

هغه وویل"ما غوښتل چې راشد خان دا کار له ایرلنډ سره په لوبې کې وکړې‌، خو ونشو." راشد خان دا مهال د کرکټ د نړیوالې شورا په درجه بندۍ کې د ۵۰ او ۲۰ اورونو د سیالیو اول بالر دی.

تر راشد مخکې د اسټرالیا کیڼ لاس تیز توپ اچوونکي میچل سټارک دا ریکارډ جوړ کړی و، خو هغه په ۵۳ لوبو کې ۱۰۰ کسان سوځولي‌ وو. د پاکستان پخواني لوبغاړي ثقلین مشتاق بیا په ۵۴ لوبو کې ۱۰۰ کسان سوځولي وو. د نیوزلنډ مخکی لوبغاړي شان بونټ اود اسټرالیا مخکنی لوبغاړی بریټ لي هم د هغوی بالرانو په ډله کې شامل دي.

راشد خان د افغانستان د ملي لوبډلې ورو توپ‌ اچوونکی دی چې د نړۍ په مشهور تجارتي‌سیالیو کې هم لوبیږي. هغه د هند په آی پي ال، د اسټرالیا په بګ بش، د بنګلدېش په بي پي ال او د ویسټ انډیز په سي پي ال کې هم لوبیږي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG