افغان حکومت وايي، د امریکا له حکومت سره ژورې ستراتيژیکې اړیکې لري او زیاتو چې دغه اړیکې د دواړو هېوادونو پر مشترګو ګټو ولاړې دي.
د افغانستان حکومت دغه څرګندونې د امریکا متحده ایالاتو د جمهور رئیس ډونالد ټرمپ تر کلنۍ وینا وروسته کوي.
د افغانستان حکومت یو ځل بیا ولي چې د سولې پروسې په اړه د سیاسیونو په شمول د ټولو اړخونو نظرونو ته درناوی لري او زیاته کړې ده چې د سولې پروسې مشري او مالکیت د افغان حکومت په لاس کې دی.
د چهارشنبې په ورځ د «سلواغې پر ۱۷مه» له ارګه رسنیو ته په لېږل شوي کلیپ کې د جمهوري ریاست د ویاند مرستیال عارف صمیم ویلي چې:"د افغانستان حکومت د امریکا له حکومت سره ژورې ستراتیژیکې اړیکې لري او دغه اړیکې د دواړو هېوادونو په مشترکو ګټو ولاړې دي."
دا په داسې حال کې ده چې د امریکا ولسمشر تېره شپه د «فبرورۍ پر ۵مه»ملت ته په خپلې وینا کې د افغانستان په هکله وویل چې د دوو لسیزو جګړو نه وروسته اوس د سولې د کوښښونو ضرورت دی.
ولسمشر ټرمپ په افغانستان کې د سولې خبرې ګټورې وبللې او زیاته یې کړه چې د سولې خبرو له پرمختګ سره به په افغانستان کې د خپلو سرتېرو شمېر راکم کړي او د ترهګرۍ پر مخنیوي به تمرکز وکړي.
تر ارګ وروسته د ملي یووالي حکومت اجرائیه ریاست هم د ولسمشر ټرمپ د کلنۍ وینا په اړه چې د افغانستان د سولې په بهیر کې د پرمختګ خبر ورکړی هر کلی وکړ.
د اجرائیه ریاست د ویاند مرستیال امید میثم د چهارشنبې په ورځ له امریکا غږ سره خبرو کې وویل چې په افغانستان کې سولې ته د رسېدو لپاره دې د وسله والو مخالفینو پر ملاتړ کوونکو هېوادونو فشارونه راوړل شي.
هغه وویل"موږ دا غواړو چې سبا سولې ته ورسېږو... د تروریزم ملاتړ کوونکي دي تر زیاتو فشارونو او بندیزونو لاندې راوستل شي، تر څو موږ د یوې تلپاتې سولې، امنیت او ثبات چې د افغانستان د خلکو یوه جدي غوښتنه ده ورسېږو."
دا په داسې حال کې ده چې تېره شپه د امریکا د بهرنیو چارو وزیر مایک پامپیو هم د افغان سولې پر روان بهیر او د افغان حکومت پر اساسي ونډې له افغان ولسمشر محمد اشرف غني سره خبرې کړي دي.
تېره شپه له ارګه په خپاره شوي بیان کې ویلي شوي چې مایک پامپیو له افغانستان سره د امریکا پر دوامدارې ملګرتیا ټېنګار کړی دی.
دا په داسې حال کې ده په دې وروستیو کې د افغان سولې په اړه د امریکا متحده ایالاتو هڅې تر بل هر وخت زیاتې شوي او ښکېلو اړخونو په دغه بهیر کې د پرمختګ خبر ورکړی دی.
په تېره جنورۍ میاشت کې په قطر کې د افغانستان د بیا پخلاینې لپاره د امریکا متحده ایالاتو ځانګړي استازي او طالب استازو ترمنځ شپږ ورځنۍ خبرې تر سره شوې.
د یادو خبرو تر پای ته رسېدو وروسته زلمي خلیلزاد وویل چې له افغانستان څخه د امریکايي ځواکونو پر وتلو یې له طالبانو سره په اصولو کې موافقه کړې ده.
ولسمشر ټرمپ څو ورځې مخکې هم وویل چې په افغانستان کې به د خپلو سرتېرو شمېر راکم کړي او د استخباراتي ماموریت لپاره به یو شمېر سرتېري په افغانستان کې پرېږدي.
