د امریکا متحده ایالاتو په افغانستان کې د خپل دوو ورک شویو اتباعو په اړه د معلوماتو ورکولو په بدل کې د لس میلیون ډالرو انعام ټاکلی دی.
کابل کې د امریکا سفارت د چهارشنبې په ورځ اګست ۲۶مه (وږي پنځمه) ویلي که افغانان د ورک شويو امریکایانو مارک رندل فریشز او پاول ایدوین اووربي په اړه معلومات لري د پیسو په بدل کې اطلاعات ورکړي.
د امریکا سفارت د معلوماتو په اساس مارک رندل فریشنر د ۲۰۲۰ په فبرورۍ کې له ورکېدو مخکې په کابل کې ژوند کاوه.
له دې وړاندې په اسلاماباد کې د امریکا سفارت هم ویلي وو چې د افغانستان د سولې لپاره د متحده ایالاتو ځانګړي استازي زلمي خلیلزاد د پاکستان له لوی درستیز جنرال قمر جاوید باجوه سره په لیدنه کې له دغه هېواد څخه د مارک فریشز په موندلو کې د مرستې غوښته کړې.
مارک فریشز د امریکا د سمندري ځواکونو تقاعد شوی غړی او د یو قراردادي شرکت مدیر دی چې د تېر لمریز کال په سلواغې میاشت کې د خوست په ښار کې وتښتول شو.
د راپورونو په اساس دغه ۵۷ کلن امریکايی د ډیورنډ کرښې ته نږدې د پاکستان قبایلي سیمو ته انتقال شوی دی.
په قطر کې د طالبانو د سیاسي دفتر ویاند سهیل شاهین د تېرې جمعې په ورځ امریکا غږ ته وویل چې دغه امریکايي وګړی دوی نه دی تښتولی.
همداشان په کابل کې د امریکا سفارت ویلي چې بل امریکايي وګړی پاول ایدوین اووربي د ۲۰۱۴ د مې میاشتې په نیمايي کې د ډیورنډ کرښې ته څیرمه په خوست ولایت کې لیدل شوی دی.
تراوسه کوم چا یا ډلې د دغو دوو امریکايي وګړو د تښتولو مسولیت نه دی منلی.
