نن جمعه د سپتمبر ۱۱ نېټه ده او امریکایان په ترهګریزو بریدونو کې د خپلو عزیزانو یاد تازه کوي.
ټیک ۱۹ کاله مخکې په همدې ورځ د القاعده ډلې ۱۹ ترهګرو په نیویارک کې له نړیوال تجارتي مرکز او د امریکا د دفاع وزارت( پنټاګان) سره الوتکې وجنګولې او یوه بله الوتکه چې د واشنګټن په لور روانه وه، د پنسلوانیا په ایالت کې په زراعتي سیمه کې ولویده.
امریکايي چارواکي وايي په دغو پېښو کې ۲۹۷۷ کسان ووژل شول او زرګونه نور ژوبل شول.
د ۹/۱۱ پېښه د امریکا پر خاوره تر ټولو خطرناک ترهګریز برید بلل کیږي.
سره له دې چې د کروناویروس د خپرېدو ویره شته، خو نن د امریکا په یو شمېر ښارونو کې پدې بریدونو کې د وژل شویو یاد تازه کیږي او د قربانیانو روح ته دوعاوې کیږي.
ټاکل شوې چې ولسمشر ټرمپ هم په همدې مناسبت په جوړو شویو مراسمو کې برخه واخلي او خبرې وکړې.
په همدې حال کې د نیویارک په ښار کې د ۹/۱۱ د پېښې په یاد جوړ شوی موزیم نن د قربانیانو د خپلو خپلوانو او سبا د ټولو خلکو لپاره پرانیستل کیږي.
په دغه موزیم کې د وژل شویو کسانو نومونه، د ړنګو شویو ودانیو پاتې شونې او ډېر نور څه د یادګار په توګه اېښودل شوي دي.
د ۹/۱۱ له برید وروسته د امریکا حکومت هغه وخت په افغانستان کې د طالبانو له نظام څخه وغوښتل چې د القاعده ډلې مشر اسامه بن لادن وروسپاري، خو طالبانو دا کار ونکړ او امریکا پر طالبانو برید وکړ او نظام یې ړنګ کړ.
امریکايي چارواکو ویل چې د القاعده ډلې په مشرۍ ترهګرو دا برید کړی دی.
د ۹/۱۱ د پېښې ۱۹ کاله وروسته ټاکل شوې چې سبا د طالبانو او افغان حکومت ترمنځ په لومړي ځل د سولې مخامخ خبرې پیل شي چې په افغانستان کې روانه جګړه ختمه شي.
