د روسیې فدراسیون په پایتخت مسکو کې د موسیقي په یو تالار کې د جمعې د شپې برید ته چې مسوولیت یې داعش په غاړه اخیستی د طالبانو د حکومت په ګډون یو شمیر سیاسي مشرانو په خپلوغبرګونونو کې دا برید په سختو ټکو غندلی دی.
په روسیه کې چارواکو ویلي چې وسله والو د دې هیواد پایتخت مسکو په یوې څنډې کې د موسیقۍ په یو تالار کي ډزې کړي، چې په پایله کې یې لږ تر لږه ۶۰ تنه وژل شوي او تر ۱۰۰ ډیر نور ټپیان شوي دي. چارواکو ویلي چې د مارچ ۲۲ (وري ۳) په پیښې کې د موسیقۍ تالار ته اور هم اچول شوی دی.
د طالبانو د حکومت د بهرنیو چارو وزارت ویاند عبدالقهار بلخي د شنبې په ورځ مارچ ۲۳ (حمل څلورم) د ایکس په پاڼه دا برید یو تروریستي برید بللی او په سخټو ټکو یې غندلی دی.
ښاغلي بلخي ویلي: " د افغانستان اسلامي امارت ( طالبانو حکومت) د روسیې په پایتخت کې وروستی تروریستي برید چې مسوولیت یې داعش په غاړه اخیستی په سختو ټکو غندي او دا ګڼي چې دا برید د بشري معیارونو څخه څرګنده سرغړونه ده. داعش چې په افغانستان او د نړۍ په نورو سیمو کې ملکي وګړي په نښه کوي، ددغه برید په ترسره کولو یو ځل بیا دا وښودله چې دا ګروپ د استخباراتي ادارو په لاس کې دی او هدف یې د اسلام بدنامول او ټوله سیمه د ګواښ سره مخ کول دي".
عبدالقهار بلخي ویلي چې د سیمې هیوادونه ددغسې پیښو پر وړاندې چې هدف یې د سیمې بې ثباته کول دي باید قاطع او څرګند دریځ ونیسي.
د افغانستان پخواني جمهور رئیس حامد کرزي هم د ایکس په ټولنیزه شبکه کې په خپله پاڼه لیکلي چې د مسکو په څنډه کې پر ملکي وګړو دا برید چې یو شمیر کسانو د مرګ ژوبلې سبب شوی په سختو ټوکو غندي. ښاغلي کرزي ددې پیښې د قربانیانو او د روسیې د حکومت او خلکو سره هم خواخوږي څرګنده کړې ده.
د پخواني جمهوري رژیم د بهرنیو چارو پخواني وزیر صلاح الدین رباني په مشرۍ د جمعیت اسلامي ګوند هم په یوه اعلامیه کې په مسکو کې دا برید غندلی او ویلي دي چې د تاوتریخوالي ډکې سخت دریځۍ او تروریزم وده او پیاوړي کیدل او د نړیوالې ټولنې ترمنځ ددغې پدیدې د ریښې د ایستلو په برخه کې نه همغږي ددې سبب کیږي چې دا پدیده د ملي سرحدونو څخه تیره شي او ګڼ شمیر هیوادونه ورسره لاس او ګریوان شي او د لا زیاتو فاجعو د پیښیدو سبب شي.
دغه ګوند ویلي: " د همدې له امله یوازې د تاوتریخوالي ډکې سخت دریځۍ او تروریزم د خطر د ګواښ په اړه ګډ درک ...کولی شي د دغې بدرنګه پدیدې له منځه وړلو لپاره د ګډې هراړخیزې همکارۍ لپاره زمینه برابره کړي".
همداشان د افغانستان د متحدې جبهې مشر سمع سادات هم دا برید په ښختو ټکو غندلی او د پیښې د قربانیانو کورنیو سره یې خواخوږي ښودلې ده.
سمع سادات ویلي: " تروریزم ملګري نلري که چیرې ورته فرصت برابر شي نو هغوی به پر هرچا او هرځای کې برید وکړي".
سمع سادات ادعا کړې چې د نړیوالو پالیسو کې په تروریستي ډلواو شبکو باندې فشارونه لیرې شوي، چې له امله یې دا ډلې د پخوا پرتله د لا پیاوړي کیدو سره بیرته میدان ته راستنې شوي دي. هغه د تروریزم پر وړاندې په متحد ډول په مبارزې ټینګار کړی دی.
د بلې په افغانستان کې د ایران پخواني سفیر محمد رضا بهرامي د طالبانو د بهرنیو چارو د وزارت د ویاند له خوا ددې برید د غندنې په اعلامیه کې دې برید ته تروریستي برید ویل تر پوښتنې راوستي دي.
ښاغلي بهرامي د ایکس په ټولنیزه شبکه کې لیکلي چې د طالبانو حکومت تیرکال د ایران د کرمان په ولایت کې تروریستي برید په غبرګون کې په اعلامیه کې د تروریستي برید د اصطلاح د کارولو څخه په دې ډډه کړې وه چې "دا یوه غربي اصطلاح ده او اسلامي هیوادونو باندې د فشار د وسیلې په توګه کارول کیږي".
د ارآی اې (RIA) خبري اژانس یو خبریال چې د پیښې په ځای کې و، ویلي چې برید کوونکو پوځي یونیفورم اغوستي و او سالون ته تر ننوتو سره سم یې ډزې پیل کړې او وروسته یې لاسي بم هم وغورځاوه چې له همدې کبله په سالون کې اور بل شو.
پیښه د مسکو په شمال کې د کراسنوګورسک په سیمې کې د موسیقۍ یو غټ تالار کې شوې چې د زرګونو کسانو د ځاییدلو ګنجایش لري.
د روسیې د فدرالي امنیت ادارې ویلي چې د لومړنیو تحقیقاتو له مخې پدې پیښې کې ۴۰ تنه وژل شوي او تر ۱۰۰ ډیر ټپي شوي.
د اسلامي دولت یا داعش ډلې په یوې اعلامیې کې چې د اعماق په خبري اژانس کې خپره شوې، ادعا کړې چې برید هغوي کړی. په اعلامیې کې ویل شوي چې پدې برید کې ګڼ شمیر مسیحان په نښه شوي و.
فورم \ دبحث خونه