د لاس رسي وړ اتصالات

افغان حکومت ۹۸ نور طالب بندیان ازاد کړل


له زندانه ازاد شوي طالب بندیان

د افغانستان د ملي امنیت شورا وايي، د ولسمشر غني د فرمان پر اساس پرون ناوخته ۹۸ تنه نور طالب زندانیان د څرخي پله له زندان څخه خوشي شول.

د ملي امنیت شورا ویاند جاوید فیصل نن یکشنبه مې درېیمه (غوايي۱۴) ویلي چې "یاد طالب بندیان د هغوی روغتیايي وضعیت، عمر او د مجازاتو د پاتې مودې ته په کتو، د سولې د هلو ځلو او د کرونا د مهارولو د هڅو د برخې په توګه خوشي شول."

په دې سره تر دا امهاله د افغان حکومت لخوا د ازاد شوو طالب بندیانو شمېر ۶۵۰ تنو ته ورسېد چې د ملي امنیت شورا په وینا ټاکل شوې ۸۵۰ نور طالب بندیان هم ازاد شي.

د ولسمشر غني د حکم په اساس ټاکل شوې ۱۵۰۰ طالب بندیان سولې ته د رسېدو او کرونا ویروس سره د مبارزې په هدف له زندانونو څخه ازاد شي.

دا په داسې حال کې ده چې وړمه ورځ په کندز ولایت کې هم د طالبانو لخوا ۴۶ بندیان ازاد شول چې د ملي امنیت شورا په وینا ۳۹ یې افغان امنیتي ځواکونه و.

د ملي امنیت شورا تېره ورځ د طالبانو لخوا د بندیانو د ازادولو هر کلی وکړ او هغه یې د سولې په وړاندې یو مهم ګام وباله.

طالبانو هم ویلي چې دوی هڅه کوي له کرونا ویروس څخه د خوندیتوب په هدف د بندیانو ازادولو بهیر چټک کړي.

دا په داسې حال کې ده چې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد پرون شنبه یو ځل بیا له افغان حکومت او طالبانو څخه وغوښتل چې د بین الافغاني خبرو پیلېدو او تلپاتې اوربند ټینګېدو په هدف د بندیانو ازادولو او اورکم په اړه هڅې ګړندۍ کړي.

د افغان حکومت له زندانونو څخه د ۵۰۰۰ طالب بندیانو او د طالبانو له بند څخه د ۱۰۰۰ زندانیانو خوشې کول، د امریکا-طالبانو د سولې د تړون یوه برخه ده چې د روان عیسوي کال د فبرورۍ په ۲۹مه د افغانستان د سولې په چارو کې د امریکا ځانګړي استازي زلمي خلیلزاد او د طالبانو د ډلې مرستیال ملا عبدالغني برادر له خوا په قطر کې لاسلیک شو.

د بندیانو د خلاصولو د بهیر تر پای ته رسېدو وروسته ټاکل شوې وه چې بین الافغاني خبري پیل شوي وای، خو اوس مهال د یادو مذاکراتو د پیلېدو څرک نه لیدل کیږي

XS
SM
MD
LG