د لاس رسي وړ اتصالات

د ټرمپ اداره غواړي چې د 5G شبکه ژر فعاله شي


5G شبکه د اوسنیو شبکو په پرتله به ١٠٠ چنده چټکه وي

امریکایي مقاماتو ویلي دي چې 5G شبکه به د بیسیم خدماتو په تکنالوژۍ کې انقلاب رامنځ ته کړي.

د امریکا د جمهور رئیس دونالد ټرمپ اداره غواړي چې د بیسیم اړیکو نوی نسل یا 5G شبکې په وړاندې شته خنډونه لرې شي او ددغې تکنالوژۍ نه کار اخیستل ژر تر ژره پیل شي.

ویل کیږي چې د 5G تکنالوژي به په سترو صنایعو کې ستر بدلونونه رامنځ ته کړي.

د سپینې ماڼۍ په یوه غونډه کې د ارتباطاتو د فدرالي کمیسیون مشر اجیت پای وویل چې "په 5G تکنالوژۍ کې د امریکا رهبري د اقتصادي ودې او سیالۍ لپاره یو ملي ضرورت دی".

ښاغلي پای وویل چې دغه تکنالوژي به په موثره توگه د سرعت او ظرفیت مسله حل کړي چې د بیسیم اړیکو نوښتونه یې ځنډولي او ښایي د اوسنیو شبکو په پرتله به ١٠٠ چنده چټکه وي.

د امریکا د متحده ایالاتو حکومتي چارواکي وایي دوی ددې تکنالوژۍ نه سترې هیلې لري او اټکل کیږي چې له دې لارې به درې میلیونه نوي کاري فرصتونه هم برابر شي. د هغوی په وینا پدې تکنالوژۍ باندې ٢٧٥ میلیارده ډالر خصوصي پانگونې او ٥٠٠ میلیارده ډالر د نویو اقتصادي ودې لپاره پانگونه کیږي.

له بلې خوا د امریکا کانگرس او تنظیم کوونکي هڅه کوي چې د 5G تکنالوژي په وړاندې محدودیتونه رفع او مقررات اصلاح کړي چې د فایبر لینونو د غزولو چارې اسانه شي کوم چې د کوچنیو د 5G انتقالاتو لپاره اړین دي.

د 5G ځانگړتیاوی

د پراخ سرعت د ایجادولو تر څنگ به 5G ترانسپورتي شبکې او خپله چلیدونکي موټر سره وصل کړي او همداشان به له لرې د روغتیایي امکانات او خدمتونه هم برابر او دقیق کړي.

5G به د معلوماتو د ترلاسه کولو موده، چې اوس په 4G تکنالوژۍ کې د وسایلو {هوښیار تلیفون او کمپیوټرونه} او انټرنیټي شبکو ترمنځ موجوده ده، لس برابره کمه کړي.

د امریکا په متحده ایالاتو کې په عمومي توگه 4G انټرنیټي شبکه چلیږي خو په ځینو برخو کې لا هم د 3G تکنالوژۍ نه کار اخیستل کیږي. 4G انټرنیټي شبکه د 3G په پرتله ١٠ چنده چټکه وه او د رپوټونو له مخې د اوسنۍ 4G شبکې په پرتله به د 5G شبکه له ٥٠ نه تر ١٠٠ ځلو پورې چټکه وي.

د چارواکو په وینا بیسیم شبکې چې نن ورځ 4G په یو کیلومتر مربع کې ١٠٠٠ وسایل سره نښلوي دا شمیره به 5G کې ښایي یو میلیون وسایلو ته لوړه شي.

XS
SM
MD
LG